Vagibiyoni—A A Va Lava Ku Rhula

DOROBA-NKULU leri nga ehenhla ka nhlohlorhi ya xintshabyana, ku vuriwa leswaku ri le xivandleni lexi a ku ri na Gibiyoni wa khale, kwalomu ka 10 wa tikhilomitara ku suka eN’walungwini wa Yerusalema.

Kumbexana wa swi tiva leswaku Gibiyoni ri tiviwe ngopfu endzhakunyana ka loko Yoxuwa a rhangele Israyele ri ya eTikweni leri Tshembisiweke ni loko a hlule Yeriko. Vakanana va le Gibiyoni va xiye leswaku a va nga ta swi kota ku langutana na Israyele, leri kahle-kahle a ri pfuniwa hi Xikwembu. A va fanela ku endla yini? Vagibiyoni va tirhise vuxisi, va rhumela vayimeri lava nga tiendla vaendzi lava humaka etikweni ra le kule. Matshalatshala lawa ya ku tisa ku rhula ma tirhile, hikuva Israyele ri endle twanano na vona. Loko vuxisi bya vona byi paluxekile, Vagibiyoni va ve varhoteli va tihunyi ni vaki va mati.

Xikwembu xi fanele xi tsakisiwile hi vanhu lava lava rhandzaka ku rhula. Xi pfune Yoxuwa loko a sirhelela Vagibiyoni lava a va hlaseriwa hi tihosi ta ntlhanu. Yehova u endle hlori hi ku lehisa siku hikwalaho ka nyimpi yoleyo.—Yoxuwa 9:3-27; 10:1-14.

Vayimburi va kume xihlovo lexi enteke kumbe xidziva exintshabyanini lexi, xi ceriwe eribyeni ro tiya. Vagibiyoni va endle switepisi eka rona leswi ya ka ehansi ivi va kuma mati lama humaka egojini. Xana leri ri nga va ri ri ‘tiva ra Gibiyoni’ leri boxiweke eka 2 Samuel 2:13? Vayimburi va kume ni makamara lama endliweke eribyeni ni switirhisiwa swo tala swo endla vhinyo. Ina, swi tikomba onge Gibiyoni a a ri ri xivandla xo endla vhinyo.

Enkarhini wa Davhida, tende kumbe tabarnakele ya Xikwembu xa ntiyiso a a yi ri kwalaho. Hosi Solomoni u te kona leswaku a endla magandzelo. Yehova u humelele eka Solomoni hi norho kutani a tshembisa ku n’wi nyika “mbilu le’yi tlhariheke,” kun’we ni rifuwo. (1 Tihosi 3:4-14; 2 Tikronika 1:3) Xihloko lexi nga eka matluka 12-17 ya nkandziyiso lowu xikomba leswaku vatukulu va vanhu lava a va tshama laha Gibiyoni, endzhaku ka nkarhi va nyikiwe lunghelo ro hlawuleka exikarhi ka tiko ra Xikwembu. Xana wa swi tiva leswaku swi endlekise ku yini?

[Laha Xifaniso Xi Humaka Kona eka tluka 32]

Pictorial Archive (Near Eastern History) Est.