Ndzilo Wu Tlhontlha Nongonoko Wo Aka

“NDZILO! Ndzilo! Holo ya Tinhlengeletano ya Timbhoni ta Yehova yi le ku tshweni!” Ku huwelela koloko ku tsemaka nhlana ku twakale hi Ravuntlhanu wun’wana ni ndzhenga hi October 1989 eHeerenveen, doroba leri nga exiyengeni xa le n’walungwini ka Netherlands.

Timbhoni ta Yehova ti tirhise Holo leyi leyinene ya Tinhlengeletano ku ringana malembe ya 11. Kwalomu ka mahelo-vhiki man’wana ni man’wana, madzana a ma hlengeletana kwalaho ku khoma nhlengeletano ya xifundza ya masiku mambirhi kumbe nhlengeletano yo hlawuleka ya siku rin’we. Yi ve ndhawu leyinene ya vuleteri bya Bibele.

Khombo ri humelele loko ntirho wu ri karhi wu ya emahlweni elwangwini ra holo. Hi xitshuketa mhangu leyi yi siye holo yi ri nkuma. Hambi swi ri tano, lexi tsakisaka, ku hava loyi a vavisekeke.

Tikhomiwe hi gome hikwalaho ko lahlekeriwa, kambe ti nga helanga matimba, Timbhoni ti endle makungu yo aka holo leyintshwa endhawini yin’wana. Ti kume ndhawu leyi faneleke eSwifterbant, exifundza-nkulu xa Flevoland. Leyi i ndhawu leyi nga ekhale ka tiko ra Zuider Zee, timitara ta ntlhanu ehansi ka vuandlalo bya lwandle.

Hi January 1991 ku endliwe xitiviso xo sungula ku aka Holo leyintshwa ya Tinhlengeletano. A yi ta akiwa exikarhi ka May na September 1991. Madzana ya Timbhoni ma tinyiketele ku ta tirha endhawini yoleyo, naswona majaha man’wana ma vone ntirho wolowo tanihi nhluvuko eku tirheleni ka Yehova Xikwembu nkarhi hinkwawo. Vatirhi vo tala va tile va huma hi le Belgium na le Nghilandi.

Muako lowo saseka wu akiwile. Laha ku tshamaka vayingiseri ni ndhawu yo dyela ku hambanisiwe hi phacisi ra lwangu ra nghilazi. Holo leyikulu yi rhurhela vanhu va 1 008 naswona van’wana va 230 va nga vona nongonoko eka swikrini swa tithelevhixini eholweni leyi nga etlhelo.

Namuntlha, madzana ma ri: ‘Tanani, a hi yeni entshaveni ya Yehova kutani u ta hi letela hi ta tindlela ta yena.’ (Esaya 2:2, 3) Holo leyi leyintshwa ya Tinhlengeletano hi yin’wana ya tindhawu to tala laha ku nyikeriwaka vuleteri byo tano bya moya. Holo ya kwalaho ya Mfumo ya Timbhoni ta Yehova hi yin’wana ya tona. Kwalaho u ta amukeriwa hi malwandla.