Va Tile Ku Nga Khathariseki Ku Nga Tshamiseki Ni Khombo
SIKU a ku ri January 2, 1992. Ndhawu—Maxixe, Xifundza xa Inhambane. Mimpfumawulo ya ni vusiku ya Afrika, le Mozambique, a yi kavanyetiwa swinene loko ku pfuriwa xiya-ni-moya. Muhaxi u tivisile: “Timbhoni ta Yehova ti na Ntsombano wa tona wa ‘Varhandzi Va Ntshunxeko’ exifundzeni xa ka hina. Xikongomelo xa vona i ku letela vanhu leswaku ntshunxeko wa ntiyiso wu nga kumiwa njhani eka misava ya namuntlha. Hinkwenu ma rhambiwa ku va kona.”
Kwalaho empfungwe wa Afrika, a ku ri karhi ku humelela mhaka leyi xiyekaka swinene! A ku khomiwa ntsombano wa muganga wa Timbhoni ta Yehova ro sungula, naswona a ku ri na vanhu va 1 024 lava teke ku ta wu tsakela. Malembe ma nga ri mangani lama hundzeke, xiendlakalo xo fana ni lexi a xi nga ta endliwa erivaleni eMozambique, tanihi leswi ntirho wa Timbhoni ta Yehova a wu yirisiwile hi nkarhi wolowo. Xana u nga swi tsakela ku twa hi ku tinyiketela loku kombisaka xivindzi, loku endliweke hi vanhu leswaku va va kona eka ntsombano lowu?
Xifundza xa Inhambane, ku fana ni swiyenge swin’wana swo tala swa Afrika, xi sasekile swinene. Mabyatso yo phasa tihlampfi yo fana ni byatso bya Maarabu, lama nga ni maseyile, ya tinhla tinharhu, ma famba-famba ekusuhi ni ribuwa ra lwandle. Mincindzu ya khokhonati yi lo vuya. Kambe ndhawu leyi yi hlaseriwe hi nala wun’wana: nyimpi ya xin’wana-manana!
Lava va etleleke etindlwini leti akiweke hi matluka ya mincindzu, a hi mhaka leyi hlamarisaka ku pfuxiwa hi mahlambandlofu, hi mpfumawulo lowu nge bum-bum-bum wa swibamu leswikulu ekusuhi ni le makaya loko nyimpi ya le nhoveni yi ri karhi yi ya emahlweni vusiku hinkwabyo. Hakanyingi i vaaki vo pfumala nandzu lava xanisekaka. Minkarhi yin’wana u vona vana va ri karhi va famba-famba va ri hava mavoko kumbe ma lamarile. Hambi van’wana va Timbhoni ta Yehova va ni swivati eswikandzeni ni le mirini hikwalaho ko khomiwa hi tihanyi.
Hinkwavo lava veke kona va wu tsakele swinene Ntsombano wa “Varhandzi Va Ntshunxeko” ehansi ka swiyimo leswi. Ku nga khathariseki leswaku yi nga tshuka yi hlaseriwa loko yi ri endleleni yo ya entsombanweni, mintlawa yo tala ya mindyangu yo huma ematiko-xikaya a a yi ti yimisele ku ta. Ku ya kona a a swi nga olovi, tanihi leswi vutleketli bya mani na mani hakanyingi ku khandziyiwaka endzhaku ka tilori letikulu leti pfulekeke. Minkarhi yin’wana vanhu va kwalomu ka 400 va manyana eka lori yin’we! Tilori leti ti endla nxaxamelo wo leha leswaku ti ta heleketiwa hi masocha.
Nora, ni vana vakwe vanharhu va vanhwanyana, va malembe lawa, rin’we, manharhu na tsevu, a ku ri wun’wana wa mindyangu leyi veke ni xivindzi xo teka riendzo leri. U hete tin’hweti to tala a ri karhi a hlengeleta mali yo kota ku hakelela riendzo leri. Mhaka ya leswaku a ku ri hava byetlelo lebyi lunghiseleriweke entsombanweni, a yi n’wi hetanga matimba. Nora ni ndyangu wakwe swin’we ni van’wana vo tala, a va sweka, va dya va tlhela va etlela erivaleni kwalaho endhawini ya nhlengeletano.
Hambi ku ri ku hisa ka le titropiki, swin’we ni mpfula leyi halakaka a swi wu hetanga ntsako wa vamakwerhu lava wa ku tiphina hi nkhuvo wa swakudya swa moya swin’we. Eka vona a ku ri hava xa nkoka ku tlula ku va entsombanweni wolowo. Ntsengo wa vanhu va 17 va kombise ku tinyiketela ka vona ematini yo kufumela ya Lwandle-nkulu ra India. Loko nkhuvulo wu ya emahlweni, ntshungu lowukulu wa vahlaleri wu susumeteriwe ku yimbelelela Yehova swidzuniso.
Ntlawa lowu va vagandzeri wu swi vone kahle leswi ku va varhandzi va ntshunxeko, swi vulaka swona. Hans, muyimeri wo huma entsindza, wa Maputo, u te: “Ha ha lo vona ntsena ku sungula ka nguva leyintshwa entirhweni wa Timbhoni ta Yehova exiphen’wini lexi xa Afrika.”