‘Nsati Wa Vuntshwa Bya Wena’

“VUUOSWI byi tikomba tanihi xiendlakalo xa siku na siku.” Ku vula vatshila vo tala hi ku ya hi Los Angeles Times. Xana mhaka yo tano ya ku hlamarisa? Kambe, mutivi wa mianakanyo Frank Pittman u pimanyeta leswaku kwalomu ka 50 wa tiphesente ta vavanuna ni ku sukela eka 30 ku ya eka 40 wa tiphesente ta vavasati a va nga tshembeki. Loko sweswo swi ri ntiyiso, ku ringana hafu ya vanhu lava tekaneke va endla vuoswi!

Xana leswi swi vula leswaku mahanyelo yo biha ma lulamile? Doo! Ku andza ka ku nga tshembeki ka vatekani a ku endli leswaku ma va lamanene—ku fana ni leswi ku andza ka vugevenga bya le xitarateni ku nga endliki leswaku swi va leswinene ku tekela un’wana mali. Mahanyelo layo biha ma vavisa. Hi xikombiso, namuntlha vanhu va xaniseka hi ntungu lowu hangalakeke wa vuvabyi bya khombo lebyi vangiwaka hi ku hlangana hi rimbewu, lebyi a byi ta lawuriwa hi ku olova loko vanhu a vo hanya vutomi lebyinene. Vuvabyi lebyi dlayaka bya AIDS a byi ta kala ndhawu loko vanhu a va nga tikhomanga hi ndlela yo biha hi tlhelo ra rimbewu.

Hambi swi ri tano, ni tintlharhi letikulu ni “lava nga ni vutivi” swa va vavisa swinene loko vanghana va vona va vukati va nga tshembeki. Ku nga tshembeki ko karhi ka vanhu lava tekaneke ku nga vanga timbanga leti nga tekaka hafu ya mpimo wa masiku ya ku hanya ku va ti tshunguleka.

Hambi swi ri tano, yinhla ya nkoka hi leswaku ku tlanga hi swihlambanyo swa vukati ni ku tikhoma hi ndlela yo biha i ku pfumala lokukulu ka xichavo eka Xikwembu, tanihi leswi xi nga Musunguri wa vukati. Bibele yi ri: “Ku tekana a ku ve loku xiximiwaka hi vanhu hinkwavo.” Ha tsundzuxiwa nakambe: “Xikwembu xi ta avanyisa timbhisa ni vaoswi.”—Vaheveru 13:4.

Kambe lavo tlhariha va yingisa marito lama huhuteriweke: “U ṭakela nsati wa v̌untŝha bya wena.” (Swivuriso 5:18) Va lava ku eneriseka ni ntsako eka vanghana va vona va vukati. Hi ku endla tano va hlayisa rihanyo ra vona ra moya ni ra nyama, naswona xa nkoka ngopfu, va xixima swinene Musunguri lonkulu wa vukati, Yehovha, Xikwembu.