Bixopo-nkulu Wa Tsandzeka!

N’WEXEMU, ku hleriwe nhlengeletano (huvo leyi hlawulekeke ya varhangeri) ya ku bula hi timhaka tin’wana ta nkoka swinene eka Kereke ya Khatoliki. Yin’wana ya tona, hi ku ya hi phepha-hungu ra Il Sabato, i “tihanyi ta mimpambukwa.” Hambi swi ri tano, phepha-hungu leri ri te: “A xi fanelanga xi va xiphiqo eka varhangeri leswaku va fikelela ntwanano emhakeni leyi. Hinkwavo va pfumela leswaku ku fanele ku endliwa vulavisisi lebyi enteke swinene bya tirhelo ra vandla lerintshwa ra vukhongeri ni xilaveko xa ku sivela ku andza ka vona, hi laha swi nga kotekaka ha kona.”

Kambe, swi le rivaleni leswaku “tihanyi ta mimpambukwa” a ko va xiphiqo xa le eItaly ntsena. Il Sabato ya vika: “Loko Bixopo lonkulu Kirill wa le Smolensk [rin’wana ra madoroba-nkulu ya khale ya le Russia] a endzela eVatican sweswinyana . . . u kombele mupapa leswaku a kuma mpfuno wa matiko hinkwawo wo langutana ni ku andza lokukulu swinene ka Timbhoni ta Yehovha ni mintlawa leyi fanaka eSoviet Union.”

Eka lembe xidzana ro sungula, varhangeri va vukhongeri lebyi vumbiweke va vilele hi ndlela leyi fanaka loko Vukreste byi hangalasiwa hi tihanyi hi lava byi namarhelaka. Eka xiendlakalo xin’wana Vayuda lava hlundzukeke va endle xivilelo eka vafumi va doroba: “Vanhu lava, lava nga pfilunganya misava hinkwayo, va fikile ni haleno”! (Mintirho 17:6) Ku sukela khale, varhangeri va vukhongeri va ringetile ku sivela ku hangalaka ka Vukreste, kambe va tsandzekile. Ni namuntlha, matshalatshala man’wana ni man’wana yo ringeta ku sivela ku hangalaka ka dyondzo ya Vukriste bya ntiyiso ma tsandzeka. Xikwembu hi xoxe xa tshembisa: “Fumu riṅwana ni riṅwana leri v̌a ri fulaka ku ku onha, ri nga ka ri nga pfuni ntšhumu, kambe ririmi riṅwana ni riṅwana le’ri nga tikurisa e ku kanetana na wena, u ta ri av̌anyisa. Hi yona nḍaka ya malanḍa ya Yehova, ni ku lulama loku nḍi nga ta v̌a nyika.”—Esaya 54:17.