‘Makhon’wa Ya Nhova’

KU PFUMALEKA ka mintirho. Minxavo leyi tlakukaka. Vusweti. Swiphiqo swa ikhonomi. Marito lawa ma humelela hi ku phindha-phindha swinene eka swiviko swa mahungu. Naswona ma kombisa ku nonon’hweriwa loku timiliyoni ti langutaneke na kona loko ti ringeta ku wundla, ku ambexa mindyangu ni ku kuma ndhawu yo tshama eka yona.

Vapfumeri ni lava nga riki vapfumeri hi ku fanana va khumbeka. Kambe vapfumeri a va tshikiwi va ri voxe eka swiphiqo sweswo. Yesu, loko a vulavula ni vanhu lava titsongahataka va lembe xidzana ro sungula, u te: “Langutani tinyanyana leti hahaka empfhukeni: A ti byari, a ti tshoveri, a ti hlengeleti nchumu eswitlatini, hikuva Tata wa n’wina wa le tilweni wa ti fihluta; xana n’wina a mi ti tluri ngopfu ke?”—Matewu 6:26.

Nakambe Yesu u te: “Xiyani mukhuva lowu swiluva swa le nhoveni leswi va nge i makhon’wa swi kulaka ha wona; a swi tirhi, a swi swuri; kambe ndza mi byela leswaku hambi a ri Solomoni evukosini bya yena hinkwabyo, a nga ambalanga tanihi xin’wana xa swona. Kutani leswi Xikwembu xi ambexaka hi ndlela leyi byanyi bya nhova, . . . xana a xi nga mi ambexi ku tlurisa sweswo?”—Matewu 6:28-30.

Xana leswi swi vula leswaku Mukreste a nga fanelanga a tirha leswaku a tihanyisa? Doo! Mukreste u fanele a tirha swinene hi laha a nga kotaka ha kona leswaku a hakela swikweleti swakwe. Muapostola Pawulo u te: “Un’wana ni un’wana loyi a nga laviki ku tirha, ni ku dya a nga dyi!” (2 Vatesalonika 3:10) Hambi swi ri tano, Mukreste wa wu xiya nkhathalelo wa Xikwembu wa rirhandzu naswona u ni ripfumelo ra leswaku Tata wakwe wa le matilweni wa n’wi langutela. Xisweswo, a nga hetiwi matimba hi swiphiqo swa vutomi. Ni le minkarhini leyi nonon’hwaka, u rhangisa swilo swa nkoka emahlweni, swilo swa moya. U tshemba marito ya Yesu: “Rhangani mi tilavela Mfumo wa yena ni ku lulama ka yena, kutani sweswo hinkwaswo mi ta engeteriwa swona.”—Matewu 6:33.