‘Loko Tintshava Ti Nga Si Tumbuluka’
“A U RI šitšhav̌elo ša hina e tinšakeni ta tinšaka. Loko tinṭhav̌a ti nga si tumbuluka, loko u nga si v̌umba misav̌a, ni ŝilo hikwaŝo, hi mikari ni mikari, u Šikwembu.” (Pisalema 90:1, 2) Marito wolawo a ma kongomisiwe eka Muvumbi wa hina, naswona ma chavelela swonghasi—ngopfu-ngopfu namuntlha, laha xilo xin’wana ni xin’wana xi tikombaka xi nga tshamisekanga!
Hikwalaho ka xiyimo lexi nyanyaka ku biha xa ikhonomi, vo tala va ni ku kanakana hi vumundzuku. Ku engeteleka loku chavisaka ka vugevenga ni ku tirhisiwa loko biha ka swidzidzirisi swi hundzule madoroba man’wana ma va timbala ta nyimpi. Hambi ku ri ndyangu, lowu ku nga khale wu simekiwile, wu le khombyeni. Hi twa swilo leswi nga tolovelekangiki swo tanihi mindyangu ya vasodoma. Nhlayo ya mindyangu leyi nga ni mutswari un’we yi ya yi engeteleka, laha mutswari un’we hakanyingi a bohekaka ku hlangavetana ni ntshikilelo lowukulu. Ku rhula ka mindyangu yo tala ku kavanyetiwa hi swiendlo swa manyala swo tanihi ku banana ka vanghana va vukati ni ku khomiwa ka vana hi ndlela yo biha.
I mani a nga ta hi kongomisa leswaku hi hlangavetana ni minkarhi leyi yo nonon’hwa? Entiyisweni swi tele switsundzuxo swa vativi va mianakanyo, vadyondzisi ni van’wana, kambe swo tala swa swona swa kanetana. Eka rixaka hinkwaro ra le Vupela-dyambu, Dr. Benjamin Spock a a ri mutsundzuxi lonkulu emhakeni ya ku dyondzisa vana. Kambe u pfumerile leswaku xitsundzuxo xa yena a xi hoxile!
I vutlharhi swonghasi ku endla Xikwembu “šitšhav̌elo ša hina”! Eminkarhini leyi ya mpfilumpfilu, hi xona ribye leri tiyeke, leri nga ta va kona “hi mikari ni mikari.” Xi vule leswi landzelaka malunghana na xona n’wini hi ku tirhisa muprofeta Malakiya: “Mina Yehova a nḍi hunḍukanga.” (Malakiya 3:6) Mimpimanyeto ya Xikwembu, hi laha yi rhekhodiweke ha kona eBibeleni, ya tshembeka swinene. Xi ve kona “tinṭhav̌a ti nga si tumbuluka,” naswona xitsundzuxo xa yena, lexi kumekaka eMatsalweni layo Kwetsima, xi seketeriwe eka vutlharhi bya yena lebyi nga riki na makumu. Hi xona ntsena lexi xi nga hi pfunaka leswaku hi kuma ntsako ni ku va lava humelelaka.
Kutani i vutlharhi ku tshemba Rito ra Xikwembu, ku nga Bibele. Ri dyondze leswaku u pfuneka hi vutlharhi bya Xikwembu. Tshemba leswi u swi dyondzaka, naswona endla leswaku swi va ku vonakala loku ku ku kongomisaka endleleni ya vutomi. (Pisalema 119:105) Hi lava va endlaka sweswo ntsena lava nga ni xivangelo xo va ni ntshembo hi vumundzuku, naswona va ni ku rhula ka xiviri emianakanyweni.