Papalata Moya Wa Ku Tikukumuxa!

Xivuriso xa vutlhari xa le Bibeleni xi ri: “L’a kurisaka nyangwa ya yena o lav̌a ku lov̌a.” (Swivuriso 17:19) I yini lexi hoxeke hi nyangwa lowo leha? Naswona xana yinhla ya xivuriso lexi hi yihi?

EMINKARHINI ya khale a swi tolovelekile ku vona vanhu kumbe ntlawa wa vahlaseri lowu fambaka hi tihanci. Makaya lama nga sirheleriwangiki lama nga tshama ma ri woxe a ma hlaseriwa hi ku olova hi makhamba. Leswaku va sivela ku yiviwa ka nhundzu ya vona, vini van’wana va makaya a va aka khumbi leri nga ni nyangwa wo hlawuleka. Khumbi a ri lehile, kambe nyangwa a yi komile. Entiyisweni, tin’wana a ti nga fiki ni le ka mitara hi ku leha—a ti komile lerova hanci ni mukhandziyi wa yona a va nga ta swi kota ku nghena. Lava a va nga tiendli ti koma tinyangwa emakaya ya vona, a swi olova leswaku vavanuna lava fambaka hi tihanci va nghena ivi va onha nhundzu ya vona.

Hi ntolovelo tinyangwa ta mahlampfu ya le madorobeni lamakulu a ti nga koki, a ti nga kombisi leswaku ku nga va ku ri na rifuwo leri nga pfaleriwa endzeni ka khumbi. Hambi swi ri tano, le Persia nyangwa yo saseka a ku ri xin’wana xa swikombiso swa vuhosi, vanhu van’wana lava nge hansi a va ringeta ku aka to fana na tona, kambe ku ri ku tinghenisa ekhombyeni lerikulu. Mani na mani loyi a a endla nyangwa wo leha ekaya ra yena a tivitanela ku tshoveriwa yona hikwalaho ka leswi a swi kombisa ku fuwa.

Xisweswo Swivuriso 17:19 yi komba leswaku lava va tiendlelaka tinyangwa to leha va tivitanela khombo hi ku tikombisa va ri ehenhla ku tlula leswi hakunene va nga swona. Xivuriso lexi xi nga ha tlhela xi tirha eka nomu tanihi nyangwa lowu lehisiweke hi ku vulavula hi ndlela yo tikukumuxa ni ku tiendla wo antswa. Ku vulavula ko tano ku vanga khombo naswona eku heteleleni ku nga yisa munhu wa manyunyu ekhombyeni. Kutani ke hakunene i vutlharhi, ku papalata moya wa ku tikukumuxa!

[Laha Xifaniso Xi Humaka Kona eka tluka 30]

Picturesque Palestine, Sinai and Egypt, Volume 1, by Colonel Wilson (1881)