Xana U Tshama U Hisa Nhova?
NHLAMULO ya wena yi ri a wu si tshama u hisa. Kambe ehleketa! Kumbexana u tshame u hisa. Yingisa marito ya mudyondzisiwa Yakobo: “Hi mukhuva wolowo, ririmi i xirho lexitsongo, kambe ri tidzunisa ngopfu hi leswikulu. Vonani hilaha xihlahla lexikulu xi nga hisiwaka hakona hi ndzilonyana lowutsongo!”—Yakobo 3:5.
Ririmi i xirho xa nkoka xo vulavula, kambe vona ndlela yo biha leyi ri tirhisiwaka ha yona! Vanhu va tirhisa ririmi ku hemba ni ku hleva ha rona. Ha rona va sandza van’wana, va onha mavito ya vona, ni ku va kanganyisa. Vahlohloteri va tirhisa ririmi leswaku va pfuxa nhlungo. Adolf Hitler u tirhise rakwe ku bela tiko hungwe ya nyimpi—kunene i ‘ndzilo wa nhova’!
Hambi lava nga ni swikongomelo leswinene va nga lumeka ‘swindzilwana swa nhova.’ Xana u tshama u vula swo karhi ivi hi ku hatlisa u navela onge loko a swi nga humanga? Loko swi ri tano, wa swi twisisa leswaku Yakobo a a vula yini loko a ku: “Kambe ku hava munhu loyi a nga dyondzisaka ririmi.”—Yakobo 3:8.
Hambi swi ri tano, hi nga ringeta ku tirhisa ririmi ra hina hi ndlela leyi akaka. Hi nga vula ku fana ni mupisalema hi ku: “Nḍi ta hitekela tindlela ta mina, leŝaku nḍi nga ti ṭhuka nḍi dyoha hi ririmi ra nga.” (Pisalema 39:1) Ematshan’wini yo sandza van’wana, hi nga ringeta ku va aka. Ematshan’wini yo hleva vanhu, hi nga vulavula kahle ha vona. Ematshan’wini ya vukanganyisi ni ku xisa, hi nga vulavula ntiyiso, hi dyondzisa wona. Loko ririmi ri susumetiwa hi mbilu leyinene, ri nga vulavula marito yo tsokombela, lama hanyisaka. Yesu u tirhise ririmi rakwe hi ndlela leyi tsakisaka, a dyondzisa vanhu ta ku pona.
Hakunene, “ku fa ni ku hanya ŝi kota hi ririmi.” (Swivuriso 18:21) Xana ririmi ra wena ra dlaya kumbe ra hanyisa? Xana ri lumeka ‘ndzilo wa nhova’ kumbe ra wu timela? Mupisalema u khongele eka Xikwembu a ku: “Ririmi ra mina a ri ḍunise rito ra wena, hikuv̌a ku lerisa ka wena hikwaku ku lulamile.” (Pisalema 119:172) Loko ho hlakulela vonelo ra mupisalema, na hina hi nga tirhisa ririmi ra hina kahle.
[Laha Xifaniso Xi Humaka Kona eka tluka 32]
U.S. Forest Service photo