Xana Mpompelo Wa Ngati Wu Tlakusiwa Ku Tlula Mpimo?

Mpompelo wa ngati wu tolovelekile eka mirhi ya manguva lawa, kambe xana i wunene? Wena u swi vona njhani?

Eka The American Journal of Medicine (February 1993), Dok. Craig S. Kitchens u vutisile: “Xana Mimpompelo Yi Tlakusiwa Ku Tlula Mpimo?” U xiye leswaku madokodela hakanyingi ma kambisisa loko mpfuno wa vutshunguri wu tlula khombo leri byi nga ha ri vangaka. Ku vuriwa yini hi mimpompelo?

Kitchens u kambele vumbhoni bya sweswinyana bya makhombo yo tala lama hlanganaka ni mimpompelo, tanihi vuvabyi bya xivindzi, nsawuto lowu heleke matimba, ku fa ka swirho, ni ku nga twanani ka laha yi humaka kona ni laha yi yaka kona. Nkambisiso wun’wana lowu katsakanyaka “swiphiqo swa ntsandza-vahlayi” leswi vangiwaka hi mimpompelo ya ngati “wu gimete hi leswaku mpompelo wun’wana ni wun’wana wu ni vuyelo lebyo biha bya kwalomu ka 20% byin’wana i byitsongo kambe byin’wana bya chavisa,” hambi ku dlaya.

Hambi swi ri tano, xana mimpfuno leyi nga kona yi nga endla leswaku u tiyimisela ku langutana ni makhombo wolawo?

Dok. Kitchens u langute minkambisiso ya 16 leyi katsaka vuhandzuri bya 1 404 lebyi endliweke eka Timbhoni ta Yehovha, leti alaka mimpompelo ya ngati hi ku yingisa xileriso xa Bibele xo ‘tshika ngati.’—Mintirho 15:28, 29.

Vuyelo byi ve byihi? “Xiboho xa muvabyi la nga Mbhoni ya Yehovha xa ku ala mpompelo wa ngati eka vuhandzuri lebyikulu ngopfu swi tikomba xi engetele 0,5% ku ya eka ta 1,5% ta mafu, ku engetela eka tindlela tin’wana hinkwato leti nga ni makhombo ta vuhandzuri. Lexi xi nga tiviwiki kahle i mpimo wa mavabyi ni mafu lama papalatiwaka hi ku wu tirhisa, kambe lawa kumbexana ma tlulaka khombo leri vaka kona loko u nga pomperiwi ngati.” (Xiitaliki i xerhu.) Yinhla yakwe hi yihi? Khombo rihi na rihi ra vutshunguri ra ku ala ngati kumbexana i ritsongo loko ri ringanisiwa ni makhombo lama katsekaka eku amukeleni ka mimpompelo ya ngati.

Hikwalaho, xivutiso lexi twalaka xa Kitchens xi ri: “Loko ku tshika ku pompela Timbhoni ta Yehovha swi vanga mavabyi ni mafu ma nga ri mangani naswona swi nga vangi ku nonon’hwa ni swiphiqo leswikulu swa rihanyo, xana vavabyi va fanele va amukela mimpompelo yitsongo?”

Lava va alaka mimpompelo hikwalaho ka xivangelo xolexo va ta va va endla hi ku pfumelelana ni swikongomiso leswi humaka eka Muvumbi wa hina.