Nkarhi Wa Ntshovelo!

HA YINI matimu ya “Vukreste” ma ve lama nga fambisaniki nikatsongo na Vukreste? Vanhu vo tala lava ehleketaka va vutisa xivutiso lexi, kambe Yesu u xi hlamurile kwalomu ka malembe ya 2 000 lama hundzeke loko a nyikela xifaniso. U vulavule hi “munhu loyi a byaleke mbewu leyinene ensin’wini ya yena.” Kutani, “ku ta nala wa yena, a ta byala mfava exikarhi ka maxalana.” Kute loko maxalana ma kurile, vatirhi va vona mfava, va lava ku wu tsuvula. Kambe munhu loyi a ku: “Swi tshikeni swi kula swin’we, ku kondza ku fika nkarhi wa ku tshovela.” Hi nkarhi wa ntshovelo, maxalana ma ta hambanisiwa ni mfava.—Matewu 13:24-30.

Loko Yesu a hlamusela xifaniso lexi, u vule leswaku hi yena hi byakwe loyi a byaleke “mbewu leyinene”—ku nga Vakreste va ntiyiso. Nala a ku ri Sathana, loyi a byaleke “mfava” ehenhla ka mbewu leyinene—loyi a ngheniseke Vakreste va vukanganysi evandlheni. Yesu u pfumele Vakreste va mavunwa ni va ntiyiso va va kona swin’we—ku kondza ku fika nkarhi wa ntshovelo. Kutani a va ta hambanisiwa.—Matewu 24:36-44.

Hikwalaho a swi hi hlamarisi loko hi dyondza leswaku eka malembe xidzana hinkwavo, tinhlengeletano ta “Vukreste” a ti xi xiximanga Xikwembu hi ku amukela tidyondzo ta vuhedeni, ku tsetselela ku tikhoma loko biha, ku seketela tinyimpi ta matiko ni minxaniso ya tihanyi. Emhakeni leyi hi kota ku vona mbewu yo biha leyi byariweke hi Sathana. Hambi swi ri tano, loko hi hlaya hi ta vanhu lava xanisiweke emakhotsweni kumbe lava dlaweke ematshan’wini yo landzula misinya ya milawu ya Bibele, hi kuma leswaku mbewu leyinene a yi lovanga.

Yesu u vule leswaku ku tshovela a ku ri “ku hela ka minkarhi.” Tanihi leswi hi hanyaka eku heleni ka mafambiselo lawa ya misava ya swilo, lowu ku fanele ku ri wona nkarhi wa ntshovelo! Kutani ku hambanisiwa ka Vakreste va ntiyiso ni va mavunwa ku fanele se ku humelerile. Namuntlha, ku fanele ku va ni vanhu lava hlanganeke, ku nga ri vanhu vo karhi ntsena lava hangalakeke, lava fanelaka nhlamuselo ya Yesu ya Vakreste va ntiyiso—lava nga vafumiwa va Mfumo wa Xikwembu, ni lava chumayelaka mahungu lamanene hi vona lava seketelaka ku tikhoma hi ndlela leyinene leyi sekeriweke eBibeleni naswona va ala tidyondzo ta vuhedeni va seketela ntiyiso wa Bibele, lowu twarisaka vito ra Xikwembu naswona va nga vi va misava.—Matewu 6:33; 24:14; Yohane 3:20; 8:32; 17:6, 16.

Ha ku tiyisekisa leswaku vanhu vo tano va kona! Xana u rhandza ku tirhela Xikwembu hi ndlela leyi xi yi amukelaka? Kutani lava vanhu lava, naswona u tirhela Xikwembu kun’we na vona.