Ku Fana Ni Murhi

“SWIPHATO swi endliwa hi swihunguki swo kota mina, kambe i Xikwembu ntsena lexi nga endlaka murhi.” Loko a bumabumela vuxongi bya mirhi leyo tala, muphati Joyce Kilmer u dzunise Xikwembu hikwalaho ka ku tumbuluxiwa ka yona.

Yehovha Xikwembu u endle mirhi ya tinxaka-nxaka, yo saseka ni leyi pfunaka. Mirhi leyo koma na leyo leha ku tlurisa hi ku fanana, yi nga ha va yi sasekile lerova swi nga koteki ku yi hlamusela. Tlhandla-kambirhi, mirhi yi endla swakudya, tihunyi na tindlu. Naswona vamaki va ya emahlweni va kuma swilo leswintshwa leswi murhi wu pfunaka ha swona.

EBibeleni, minkarhi yin’wana mirhi yi tirhisiwe hi ku fanekisela ku yimela mimfumo, vafumi na vanhu. (Ezekiyele 31:1-18; Daniyele 4:10-26) Mirhi yi hlamuseriwe yi ri leyi yimelaka swiyimo swa ntsako, ku rhula, ni leswi vuyerisaka, leswi humaka eka vuhosi bya Yehovha na ku kondleteriwa ka vanhu va yena. (1 Tikronika 16:33; Esaya 55:12; Ezekiyele 34:27; 36:30) Nakambe Matsalwa ma tshembisa leswaku masiku ya vanhu va Xikwembu ma ta fana ni ya mirhi. (Esaya 65:22) Leyi i mhaka ya nkoka loko hi xiya leswaku mirhi yin’wana yi hanya malembe xidzana yo tala.

Mupisalema wa le Bibeleni u vule leswaku munhu la tsakelaka nawu wa Xikwembu “o fana ni muri lo’wu simekiweke kusuhi ni milambu ya mati, lowu tŝalaka mihanḍu ya wona hi nkari wa wona, lowu matluka ya wona ma nga omiki: Hikwaŝo leŝi a ŝi endlaka ŝi ta kateka.” Muri lowunene lowu simekiweke ekusuhi ni swihlovo swa mati layo tala wu tsundzuxe mupisalema hi rifuwo ra moya leri kumiwaka hi loyi a “tiṭakela[ka] e nawini wa Yehova.” (Pisalema 1:1-3) Loko u tsakela nawu wa Xikwembu na Rito ro Kwetsima hi mbilu hinkwayo, masiku ya wena ma nga fana ni ya murhi. Entiyisweni, loko u hanya hi ku pfumelelana ni vutivi lebyi kongomeke bya Yehovha Xikwembu na Yesu Kreste, u nga tsakela ntshembo wa vutomi lebyi nga heriki.—Yohane 17:3.