Nkarhi Wun’we Ku Ringana Khume Ra Malembe!

LOKO makwerhu wa xisati la rhandzekaka wa Mupaniya a vutisiwa leswaku u titwe njhani malembe ya khume lama hundzeke loko nkandziyiso wa Xihondzo xo Rindza wa Xipaniya wu sungule ku humesiwa nkarhi wun’we ni wa Xinghezi, u hlamule a ku: ‘Hi vona ku ri nkateko hikuva se hi dyondza mhaka leyi fanaka ni ya nkandziyiso wa Xinghezi. Loko ndzi ku Xinghezi nkarhi hinkwawo ndzi ehleketa hi nhlengeletano. Hi kombetela eka nhlengeletano tanihi “Manana.” Hi titwa hi ri ni vuxaka lebyikulu. Swi sasekile. Swa tsakisa!’

Makwerhu loyi wa xisati la tshembekaka u phofule ndlela leyi vo tala lava tsandzekaka ku hlaya Xinghezi va titwaka ha yona. Emalembeni lama hundzeke, swihloko a swi humelela enkandziyisweni wa Xipaniya wa Xihondzo xo Rindza tin’hweti ta kwalomu ka tsevu endzhaku ka loko swi humesiwile hi Xinghezi. Tindzimi tin’wana na tona a ti huma endzhaku. Swa twisiseka leswaku a ku naveriwa ku humesa rungula leri fanaka hi nkarhi lowu fanaka, hi tindzimi to tala.

Kutani ku sukela enkandziyisweni wa April 1, 1984, nkandziyiso wa Xipaniya hi wona wo sungula ku huma hi nkarhi wun’we ni nkandziyiso wa Xinghezi. Tindzimi tin’wana na tona hi xihatla ti landzerile. Eku sunguleni ka 1985, minkandziyiso ya tindzimi ta 23 a yi huma hi nkarhi wun’we. Loko ku kumiwa vahundzuluxeri va leteriwa, minkandziyiso ya tindzimi to tala yi sungule ku fambisana ni Xinghezi.

Nkandziyiso lowu wa Xihondzo xo Rindza wu na khume ra malembe sweswi wu huma hi nkarhi wun’we ni Xinghezi. Xihondzo xo Rindza sweswi xi humesiwa hi tindzimi ta 116, naswona 85 wa tona ti huma hi nkarhi wun’we. Leswi swi vula leswaku tiphesente ta 99,3 ta nhlayo-xikarhi ya 16 100 000 wa tikopi leti humesiwaka ta Xihondzo xo Rindza ti humesiwa ti ri ni xifunengeto lexi hleriweke ku fana ni swihloko leswi fanaka. Eka lava va vaka kona vhiki na vhiki eka Dyondzo ya Xihondzo xo Rindza, ku tlula 95 wa tiphesente va dyondza xihloko lexi fanaka hi nkarhi lowu fanaka.

Xalamuka! munghana wa magazini wa Xihondzo xo Rindza, yi humesiwa nkarhi wun’we hi tindzimi ta 37 eka leta 74. Yearbook of Jehovah’s Witnesses leyi humaka lembe na lembe yi kandziyisiwa hi tindzimi ta 18. Minkandziyiso yo tano leyi humaka hi nkarhi wun’we yi pfuna ku hlanganisa vanhu va Xikwembu leswaku ‘va hlangana va va van’we eku anakanyeni ni le makungwini ya vona.’—1 Vakorinto 1:10.