I Ya Nkoka Ku Tlula Tikorali

Nhlayo leyikulu ya vapfhumba yi tsakisiwe ngopfu hi minkombiso yo fana ni leyi nga le matini ya Lwandle ro Tshwuka.

Tinhlampfi to tala swinene ta mivalavala ti tsakisa lava hlambelaka ematini yo tenga. Kambe xiya leswaku exikarhi ka tinhlampfi ta mivalavala leti voniwaka laha, ku na nkombiso lowu kokaka mahlo wa swihlamariso swin’wana swa le ndzeni ka lwandle, ku katsa ni tikorali ta mivala yo vangama.

Tikorali to saseka ti kumeka hi swivumbeko swo hambana-hambana ni mivalavala. Hi laha u nga ha tsundzukaka ha kona, ni le minkarhini ya le ndzhaku swipetlu swa tikorali a swi tekiwa swi ri swa nkoka swinene. Vatshila va ti tirhise ku endla swin’wetsin’wetsi swo saseka, naswona vatsari va Bibele va boxe tikorali kun’we ni nsuku, silivhere ni rubisi. (Swivuriso 3:14, 15; Ezekiyele 27:16) Kambe vatsari volavo va hi pfuna ku vona leswi tlulaka ku saseka ni nkoka wa tikorali hi toxe.

Va kandziyise leswaku swin’wana i swa nkoka swinene, naswona hi fanele hi swi teka swi ri swa risima. Xin’wana xa swona i wansati lonene la nga ni vuswikoti, hikuva hi hlaya leswi landzelaka: “Wansati wa matimba, i mani l’a nga ta ṅwi kuma? O tlula kule nšav̌o wa risima wa [tikorali, NW].” (Swivuriso 31:10) Xana u wanuna la tekeke? Languta nakambe eka tikorali leti to hlawuleka, ivi u vona loko u xixima nsati wa wena hi laha a faneleke ku xiximiwa ha kona.

Ku nga khathariseki leswaku hi vavanuna kumbe vavasati, hambi hi nghenele vukati kumbe hi titshamele hexe, ku vona tikorali to vangama swi fanele ku hi pfuna ku tlangela rifuwo lerikulu swinene ra vutlhari, ku twisisa ni vutivi bya Xikwembu. Rito ra Xikwembu ri ri: “Ku katekile munhu loyi a kumaka ku twisisa, ni loyi a kumaka v̌utlhari! Hikuv̌a binḍu ra byona ri tlula silver, ni ku anḍa ka byona ku tlula nsuku; byi tlula [tikorali] hi risima, hinkwaŝo le’ŝi nav̌etaka a ŝi byi ringani.”—Swivuriso 3:13-15; 8:11.

Kutani hambi hi ti vona loko hi hlambela hi hexe kumbe eka xifaniso, tikorali ta le Lwandle ro Tshwuka ti fanele ku endla leswaku hi tlangela ku saseka naswona hi anakanyisisa ha tona.