Xana Wa Yi Xixima Bibele?

EKA malembe yo tlula 200 lama hundzeke, Mary Jones u velekiwile le Llanfihangel, ku nga ximutana lexi nga xoxe xa Mawelsh ekusuhi na timbuwa ta Atlantic. Vatswari va yena a va ri varhungi lava sweleke swinene—a va swele lerova va pfumala ni Bibele. Kambe va byale ku rhandza Xikwembu embilwini ya xinhwanyetana xa vona hi ku hamba va xi rungulela timhaka ta Bibele ni ku vula tindzimana leti va ti tsundzukaka hi ku phindha-phindha. Mary a a tala ku hlaya Bibele ya Xiwelsh ya muakelana wa vona ivi a sungula ku veka swimalana leswi a a swi kuma, a tiyimisele ku tixavela yakwe.

Hi lembe ra 1800, loko Mary a ri na malembe ya 16, u twe leswaku a ku xavisiwa Tibibele ta Xiwelsh exidorobanini lexi vuriwaka Bala, ku nga mpfhuka wo ringana tikhilomitara ta 40. Handle ko hela matimba, u kanye mbilu a pandza hi nenge a ya kona. Ina, u fambe hi milenge a nga ambalanga tintangu a khandziya swintshabyana a ya kona. Kambe, loko a fika kona, tikopi se a ti xavisiwe hinkwato. Mary u tlhele a kuma ni leswaku mali leyi a a yi hlengeletile a yi ri yitsongo swinene.

Mufundhisi wa kwalaho u tsakisiwe swinene hi vutivi lebyi Mary a ri na byona ni ku rhandza ka yena Bibele. Loko a n’wi vona a rila hi ku anakanya matshalatshala yonghasi lawa a ma endleke, u n’wi nyike kopi ya yena n’wini, a ku: “Yi hlaye hi vukheta, yi dyondze hi ku tiyimisela, hlayisa marito lawa yo kwetsima emianakanyweni ya wena, ivi u tirhisa tidyondzo ta yona evuton’wini bya wena.”

Mhaka leyi endzhakunyana yi runguriwile eka nhlangano wa Komiti ya Religious Tract Society ya le London. Kwalaho ku endliwe xiboho xo hangalasa vuhundzuluxeri bya Bibele emisaveni hinkwayo, ku nga ri eka vanhu va le Wales ntsena. Masungulo lawa ya le hansi ma tswale mavandla yo tala ya Bibele ya lembe xidzana ra vu-19. Xisweswo, tikopi ta Bibele ta tindzimi timbe ti sungule ku andza swinene.

Namuntlha, Watch Tower Bible and Tract Society, leyi simekiweke hi 1884, yi kandziyisa Tibibele ni tibuku to pfuna ku hlaya Bibele hi tindzimi to tlula 200. Emisaveni hinkwayo, yi hangalase tikopi ta timiliyoni ta 72 ta New World Translation of the Holy Scriptures ya ririmi ra manguva lawa. Yi hundzuluxeriwe yi huma eka Xiheveru ni Xigriki xo sungula, sweswi New World Translation yi kumeka yi helerile kumbe hi xiphemu hi tindzimi ta 18 naswona sweswi yi karhi ya hundzuluxeriwa hi tindzimi tin’wana ta 12.

Leswi Bibele se yi kumekaka eka vanhu vo tala, xana u yi tekisa ku yini? Xana Bibele u yi languta yi ri ya nkoka? Xana u na yona kopi ya yona leyi u yi langutaka yi ri ya nkoka, leyi u yi hlayaka?

[Laha Xifaniso Xi Humaka Kona eka tluka 3]

From the book The Story of Mary Jones and Her Bible