Abrahama—U Lahliwile Laha, Kambe Wa Ha Hanya Xana?

Hi malembe xidzana Vayuda, Mamoslem na Vakreste va endzerile xivandla lexi.

U nga xi endzela emutini wa khale wa Hebroni, edzongeni wa Yerusalema. Xivandla lexi xi vuriwa Haram el-Khalil na Sirha ra Vapatriarka. Ina xivandla lexi xi tiviwa ngopfu tanihi ndhawu ya xilahlo ya vapatriarka Abrahama, Isaka na Yakobo, xikan’we na vavasati va vona Sara, Rhaveka na Leya.

Tsundzuka leswaku Bibele yi ri loko ku fa nsati wa yena loyi a n’wi rhandza, Sara, Abrahama u xavile bako tanihi ndhawu ya xilahlo na nsimu ya Makapela, ekusuhi na Hebroni. (Genesa 23:2-20) Endzhakunyana, Abrahama na yena u lahliwile laha, tanihi swirho leswin’wana swa ndyangu. Malembe xidzana endzhakunyana, ematlhelo ka ndhawu leyi ya xilahlo ya ndyangu, Heroda Lonkulu u akile muako lowu kokaka mahlo lowu hi ku famba ka nkarhi wu nga cinciwa no kurisiwa hi vahluri, va kombisa tidyondzo ta vona ta vukhongeri.

Loko u nghena u vona ti-cenotaph ta tsevu (switsundzuxo kumbe masirha lama nga riki na nchumu). Xifaniso lexitsongo xi kombisa ra Isaka n’wana wa Abrahama. Ekusuhi na rona ku ni mabako lama nghenaka ehansi, lawa a ma tirhisiwa ku ya vona leswi nga ehansi. Valavisisi va kumile makamara lawa ma vonakaka onge a ma ri na marhambu yo tala ya khale.

Ku vuriwa yini hi Abrahama? Loko a lahliwe ebakweni leri sweswi ri nga ehansi ka xivandla lexi, u file khale, a hi ntiyiso wolowo ke? Vaendzi vo tala va vula tano. Kambe muprofeta lonkulu eka Abrahama u vule leswaku Abrahama wa ha hanya hi mukhuva wo karhi. Njhani? Naswona leswi swi nga ri khumba njhani ripfumelo ra wena?

Hlaya xihloko lexi nge “Varhandziwa Va Wena Lava Feke—Va Kwihi?” (Tluka 3) Xi kombisa leswi muprofeta loyi lonkulu a swi vuleke mayelana na ku va Abrahama a ha hanya, ku nga rungula leri nga vaka ra nkoka lowukulu eka wena na ndyangu wa wena.