Marito Lama Nga Ni Nhlamuselo Yo Hlawuleka

“IEHOVA SIT TIBI CUSTOS”

MARITO lawa ma tsariweke emahlweni ka khumbi ra yindlu ya lembe-xidzana ra vu-17 eCelerina, evuxeni bya Switzerland, ma vula leswaku “Yehovha a ve musirheleri wa wena.” Endhawini leyi ya tintshava, swi tolovelekile ku kuma vito ra Xikwembu ri tsariwe ri vonaka kumbe ri tsariwe hi pende etindlwini, etikerekeni ni le miakweni ya vaprista, leyi nga ni malembe-xidzana yi ri kona. Xana swi tise ku yini leswaku vito leri nge Yehovha ri tiviwa ngopfu?

Khale ka tiko ra Rhaetia (leri hlanganisaka swiyenge swa matiko lawa sweswi ma nga dzonga-vuxa wa Jarimani, Austria ni vuxa bya Switzerland) ri ve xifundzha xa Rhoma hi 15 B.C.E. Vaaki va rona a va vulavula Xirhomanishi, ririmi leri tekiwaka eka Xilatini, leri kuleke ri va ni marhavi ya tindzimi leti ta ha vulavuriwaka emigangeni leyi nga eminkoveni ya tintshava ta le Switzerland ni le dzongeni wa Italy.

Hi ku famba ka nkarhi, swiyenge swa Bibele swi hundzuluxeriwe hi Xirhomanishi. Nkandziyiso wun’wana lowu nge Biblia Pitschna, a wu tamele Tipisalema ni Matsalwa ya Vukreste ya Xigriki. EBibeleni leyi, leyi humesiweke hi 1666, vito leri nge Iehova a ri humelela minkarhi yo tala eka Tipisalema hinkwato. Tanihi leswi Bibele a ku ri buku leyi hlayiwaka ngopfu ekaya, vahlayi va Biblia Pitschna va sungule ku tolovela vito ra Muvumbi.

Hambi swi ri tano, tinxaka leti landzeleke a ti nga ti tsakeli timhaka ta Bibele. Vo tala a va nga ri na mhaka hambi ku vutisa leswi vito leri nge “Iehova” ri vulaka swona, hambi vafundhisi a va tikarhatanga hi ku ri hlamusela. Hikwalaho, marito lawa ma hundzuke swisasekisi ntsena swa nguva ya khale.

Emalembeni ya sweswinyana ku ve ni ku hundzuka loku hlamarisaka ka matwisiselo. Timbhoni ta Yehovha ti tile ti huma etindhawini ta le kule, ti heta masiku yo wisa emigangeni leyi yo saseka ya le minkoveni, ti endla matshalatshala yo dyondzisa vaaki hi Xikwembu lexi vito ra xona ku nga Yehovha. Timbhoni tin’wana ti akile endhawini leyi leswaku ti heta nkarhi wo tala ti byela vanhu hi swikongomelo leswi hlamarisaka swa Muvumbi, malunghana ni misava ni vanhu. Xisweswo, marito lawa ya Xirhomanishi ya matsalelo ya khale, ma va ya nkoka eka vanhu lava, tanihi leswi va dyondzaka hi Yehovha, Xikwembu xa ntiyiso.

[Swifaniso leswi nga eka tluka 32]

IEHOVA PORTIO MEA: Yehovha i ku averiwa ka mina.—Vona Pisalema 119:57