“Timitsu Leti Nga Simulekiki”

EXIKARHI ka swilo swa misava leswikulu ni swa malembe yo tala leswi hanyaka, ku ni mirhi ya sequoia ya le California. Mirhi leyi leyikulu yi leha timitara ta 90 loko yi kurile naswona yi nga hanya malembe ya kwalomu ka 3 000.

Hambi leswi murhi wa sequoia wu tsuvulaka ni misisi loko u wu languta, timitsu ta wona leti nga vonakiki na tona ta hlamarisa. Murhi wa sequoia wu ni timitsu leti naveke leti nga hlanganisaka ndhawu leyikulu ya tihektara ta 1,2 kumbe ta 1,6. Timitsu leti to tala ti endla xisekelo lexi tiyeke loko ko tshuka ku ve ni ndhambhi kumbe bubutsa. Naswona swi nga ha koteka leswaku murhi wa sequoia wu pona ku tsekatseka lokukulu ka misava!

Hosi Solomoni u hlawule timitsu ta matimba ta murhi tanihi mavekelo ya xigego eka xin’wana xa swivuriso swakwe. U te: “Munhu wa mintirho yo homboloka, a nga hlweli ku wela hansi, kasi munhu wo lulama ú ni timitsu leti nga simulekiki.” (Swivuriso 12:3, BML) Ina, lavo homboloka va le misaveni leyi tsekatsekaka. Ku humelela kun’wana ni kun’wana loku va tikombaka va ri na kona i ka nkarhinyana ntsena, hikuva Yehovha u tshembisa leswaku “ku langutela ka la’v̌a nga lulamangiki ku ta lov̌a.”—Swivuriso 10:28.

Lexi i xitsundzuxo eka lava tivulaka Vakreste, hikuva Yesu u vule leswaku van’wana a va nge vi “na timitsu” naswona va ta khunguvanyeka. (Matewu 13:21) Ku tlula kwalaho, muapostola Pawulo u tsale hi vanhu lava a va ta ‘tlhekatlhekisiwa ni ku yisiwa hala ni hala hi mheho yihi ni yihi ya dyondzo ya mavunwa.’ (Vaefesa 4:14) Xana leswi swi nga siveriwa njhani?

Tanihi leswi timitsu ta murhi wa sequoia ti navaka emisaveni leyi noneke, mianakanyo ni timbilu ta hina swi fanele swi nghena hi vuenti eRitweni ra Xikwembu, hi nwa ni mati ya rona lama nyikaka vutomi. Leswi swi ta hi pfuna leswaku hi va ni ripfumelo leri enteke swinene. Ina, hi ta langutana ni miringo leyi kotisaka bubutsa. Hi nga ha tsekatseka, ku kota murhi, loko hi ri emaxangwini. Kambe loko ripfumelo ra hina ri tiye kahle, hi ta va ni “timitsu leti nga simulekiki.”—Ringanisa Vaheveru 6:19.