Ha Yini Lavo Homboloka Swi Va Fambela Kahle?

“ŠANA timbabva ti hanya ha yini?” Xivutiso lexi xi vutisiwe emalembeni yo tala lama hundzeke hi Yobo wo tshembeka, naswona xi engetiwe ko tala ku sukela esikwini ra yena. Kumbexana xi le mianakanyweni ya vanhu vo tala va le ndhawini ya khale ka Yugoslavia, (tanihi wansati la kombisiweke eka xifunengeto xa hina) lava rilaka ni ku xaniseka hikwalaho ka nyimpi ya tihanyi. Ha yini vanhu vo biha va hanya va tlhela va humelela? Hi laha Yobo a xiyeke ha kona, hi xitalo “tindlu ta v̌ona ti ṭhamile ku ṭakeni, ti sireriwa, a ti tšhav̌i, nhonga ya Šikwembu a yi ṭhami henhla ka v̌ona.”—Yobo 21:7, 9.

Xana leswi swi vula leswaku a hi swa nkoka ku tirhela Xikwembu, ku rhandza muakelani, ni ku papalata ku endla leswi hoxeke? Nikatsongo! Bibele yi hi nyika langutelo lerinene loko yi ku: “U nga ṭhuki u karihela la’v̌o homboloka, u nga ṭhuki u nav̌ela la’v̌a endlaka le’ŝo biha. Hikuv̌a v̌a ta ṭemiwa ŝeŝi kukotisa byanyi, v̌a ta v̌una kukotisa rihlaza. Ṭhemba Yehova, u endla leŝo lulama.”—Pisalema 37:1-3.

Hakunene, ku humelela loku vonakaka ku ri kona ka lavo biha i ka xinkarhana. Ntiyiso hi leswaku vutomi bya vona byi komile swinene, kasi lava tirhelaka Xikwembu va ni ntshembo lowu tsakisaka wa vumundzuku. Ku nga ri khale xitshembiso xa Xikwembu xi ta hetisisiwa: “[Xikwembu] xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.” (Nhlavutelo 21:4) Hi lavo lulama lava nga ta vona nkarhi wolowo, hayi lavo biha. Vona xikhutazo xonghasi xo tshinela ekusuhi ni Xikwembu kutani hi dyondza ku endla ku rhandza ka xona, ku nga khathariseki leswaku vanhu lava hi rhendzeleke va bihe ku fikela kwihi!

Loko u ta lava ku kuma rungula leri engetelekeke kumbe u swi tsakela leswaku un’wana a ku endzela a ta va ni dyondzo ya le kaya ya Bibele ya mahala na wena, hi kombela u tsalela eka Watch Tower, Private Bag X2067, Krugersdorp, 1740, kumbe eka adirese leyi faneleke eka leti xaxametiweke eka tluka 2.