“Ku Rhula Ka Xikwembu Loku Tlulaka Ku Twisisa Hinkwako”

EMATIN’WINI hinkwawo, malandza layo tshembeka ya Xikwembu minkarhi yo tala ma langutane ni gome lerikulu. Leswi i ntiyiso swinene namuntlha, tanihi leswi hi hanyaka ‘eminkarhini yo nonon’hwa’! (2 Timotiya 3:1) Muapostola Pawulo u tsundzuxe Vakreste leswaku va rhula mivilelo ya vona eka Yehovha hi xikhongelo. Vuyelo bya kona byi va byihi? “Ku rhula ka Xikwembu loku tlulaka ku twisisa hinkwako, ku ta hlayisa timbilu ta n’wina ni mianakanyo ya n’wina eka Kriste Yesu.”—Vafilipiya 4:7.

Xana “ku rhula ka Xikwembu” i yini? I ku rhula loku tisiwaka hi ku va ni vuxaka bya le kusuhi ni Muvumbi. Vuxaka byo tano byi hi nyika ntshembo wa leswaku, ku nga khathariseki gome leri hi vaka na rona, Yehovha “a nga ka a nga tshiki vanhu va yena; a nga ka a nga cukumeti lava va nga va yena.”—Pisalema 94:14, Today’s English Version.

Leswi a swi vuli swona leswaku hi nge tshuki hi langutana ni maxangu. Mupisalema u tsarile a ku: “Makhombo ya l’a lulameke ma tele ngopfu.” (Pisalema 34:19) Kambe ku rhula ka Xikwembu ku nga tisa ku wisa. Njhani?

Ku rhula ka Xikwembu “ku tlula ku twisisa hinkwako,” hi laha Pawulo a tsaleke ha kona—kumbe tanihi laha ku tsariweke ha kona eka Concordant Version, ku “tlula matimba man’wana ni man’wana ya mianakanyo.” Maxangu ma nga hi vangela leswaku hi tsana hi tindlela to hambana-hambana emintlhavekweni. (Eklesiasta 7:7) Hambi swi ri tano ku rhula ka Xikwembu ku nga hi tiyisa, ngopfu-ngopfu loko hi lava ‘matimba lama hlamarisaka.’—2 Vakorinto 4:7; 2 Timotiya 1:7.

Ku tlula kwalaho, ku rhula ka Xikwembu i xisirhelelo. Ku nga “hlayisa timbilu ta n’wina ni mianakanyo ya n’wina,” tanihi laha Pawulo a tsaleleke Vafilipiya ha kona. Rito ra Xigriki leri hundzuluxeriweke va ku ‘rindza’ i xiga lexi tirhisiwaka hi masocha lexi kumbexana a xi endla munhu a anakanya hi varindzi lava langutelaka vusiku ni nhlikanhi. Hi ndlela leyi fanaka, ku rhula ka Xikwembu ku nga tirha tanihi murindzi wa vusiku ni nhlikanhi etimbilwini ta hina ni le matimbeni ya mianakanyo ya hina.—1 Vakorinto 10:13; ringanisa Vaefesa 4:26.

Loko hi anakanya hi swiyimo swo nonon’hwa leswi hi langutanaka na swona namutlha, xana a hi fanelenga hi tlangela ku rhula ka Xikwembu?—Pisalema 18:2; ringanisa Eksoda 40:38.