I Xitsongo Kambe Xi Ni Matimba

ROBERT, jaha ro huma eCanada, u famba-fambe eYuropa a lavisisa xikongomelo xa vutomi. U vone swilo swo tala leswi n’wi endleke a titwa a nga byi tsakeli vumundzuku.

Loko a ha tshamile ekhefini le Seville, eSpain, Robert u nyikiwe xiphephana lexi humesiweke hi Timbhoni ta Yehovha. Eku sunguleni, Robert a a kanakana. U te: “Hambi swi ri tano, ndzi xi hlayile. A swi hlamuseleki, kambe xikan’we-kan’we ndzi vone xi twisiseka. Hi nkarhi wa ku famba-famba ka mina, ndzi vone swivumbeko swo tala swa gome ni ku wa ka mafumelo ya vanhu, naswona a ndzi karhateka hikwalaho ko tsandzeka ka mina ku cinca swilo. Endzhaku ko hlaya xiphephana lexi, ndzi tivutisile, ‘Xana “misava [leyi] leyintshwa” swi ta koteka leswaku yi va kona ke?’ Kutani ndzi ku, ‘Ina, kumbexana swi ta koteka.’”

Leswi se ntshembo wa yena a wu pfuxetiwile, Robert u tsalele hofisi ya Timbhoni ta Yehovha ya le Canada, a kombela leswaku un’wana a n’wi endzela loko se a tlhelele ekaya, a ta n’wi pfuna leswaku a twisisa Bibele.

Handle ko kanakana, rito leri vulavuriwaka ri ni matimba. Hambi swi ri tano, u nga ma tekeli ehansi matimba ya rungula leri tsariweke. Tibuku leti sekeriweke eBibeleni ti na matimba lama tirhaka, ku nga khathariseki mpimo wa tona. Ti khumba mianakanyo ni mbilu, ti nyika ntshembo lowu tiyeke wa vumundzuku.—Vaheveru 4:12.