‘Ku Fana Ni Masiku Ya Murhi’

MALEMBE lama tlulaka magidi manharhu lama hundzeke, Muxe u tsarile: “Masiku ya ku hanya ka hina, ma ringana malembe ya 70, ni ka la’v̌a tiyeke, ma fika ka malembe ya 80; kutani ku tiḍunisa loku v̌a ku kumaka ka wona i ku v̌av̌iseka ni gome.”—Pisalema 90:10.

Ku nga khathariseki nhluvuko wa vutshunguri, ku leha ka vutomi bya vanhu ka ha ri hi ndlela leyi a ku ri ha yona esikwini ra Muxe. Hambi swi ri tano, a hi minkarhi hinkwayo laha vanhu va nga ta hanya nkarhi wo komisa xisweswo. Ebukwini ya Bibele ya Esaya, Xikwembu xi te: “Hikuv̌a masiku ya tiko ra mina ma ta ringana ni masiku ya miri, kutani v̌ahlawuriwa v̌a mina v̌a ta ṭakela ntiro wa mav̌oko ya v̌ona.”—Esaya 65:22.

Wun’wana wa mirhi leyi hanyaka ngopfu ematikweni ya Bibele i murhi wa mutlhwari. Murhi lowu fanisiweke laha hi wun’wana wa mirhi ya mitlhwari leyi hanyeke magidi yo tala ya malembe lowu wa ha riki kona eGaleliya. Hi rini laha vanhu va nga ta hanya nkarhi wo lehisa xisweswo? Vuprofeta lebyi fanaka byi hlamusela leswaku ku ta va loko Xikwembu xi vumba “matilo la’mantŝha, ni misav̌a le’yintŝha.”—Esaya 65:17.

Buku ya Nhlavutelo na yona yi nyika vuprofeta bya ku akiwa ka “tilo lerintshwa ni misava leyintshwa”—hulumendhe leyintshwa ya le tilweni ni vandla lerintshwa ra vanhu loko Xikwembu xi “sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona.”—Nhlavutelo 21:1, 4.

Xitshembiso lexi xa Xikwembu xi ta hetiseka ku nga ri khale. Kutani, hambi ku ri masiku ya murhi wa mutlhwari ma ta vonaka onge i siku ra tiawara ta 24. Naswona hi ta va ni nkarhi lowu eneleke wo tsakela ntirho wa mavoko ya hina.