‘Hi Laha Nsimbi Yin’Wana Yi Lotaka Nsimbi Yin’wana Ha Kona’

KU YA eku heleni ka lembe-xidzana ra vunharhu C.E., jaha ra nkhinkhi leri vitaniwaka Anthony, leri hlamuseriwaka tanihi “Mukreste wa Mucoptic,” ri siye hinkwaswo ri famba ri ya heta malembe ya 20 ri ri roxe emananga. Hikwalaho ka yini? A ri vona onge yoleyo hi yona ndlela yo antswa eka rona yo tirhela Xikwembu. I Mujagana wo sungula, la nga ni nkucetelo lowukulu, ku ya tshama a ri yexe emananga.

Namuntlha, Vujagana byi ni vanhu vo hlayanyana lava sukaka va ya tshama emananga va ri voxe. Kambe vanhu va ya va tihambanisa ni van’wana hi ndlela yin’wana. Va ala ku vulavula ni van’wana hi vukhongeri, va vona onge ku vulavula ko tano ku vanga timholovo ni ku lwa. Vugandzeri bya vona ngopfu-ngopfu byi katsa ku nga endli nchumu lexi nga vavisaka muakelani wa vona.

I ntiyiso, ku nga vavisi muakelani wa wena i xiphemu xa vugandzeri bya ntiyiso, kambe ku laveka ni swin’wana. Xivuriso xa khale xi ri: “Nsimbi yi lota nsimbi, hi ŝeŝo ka munhu, o hlohlotela v̌ukari bya munhu.” (Swivuriso 27:17) Ntiyiso hi leswaku, Bibele yi khutaza Vakreste leswaku va hlengeletana swin’we, hayi ku tihambanisa, hi laha ku heleleke ni misava kumbe Vakreste van’wana. (Yohane 17:14, 15) Yi ri: “A hi laveni tindlela to pfuxana, hi kombana rirhandzu ni mintirho leyinene. Hi nga tshiki ku hlengeletana. (Vaheveru 10:24, 25) Timbhoni ta Yehovha ti landzelela ndzayo yoleyo. Hi makhamba yo hlayanyana hi vhiki, ta hlengeletana leswaku ‘tilotana,’ ti aka ripfumelo ra vapfumeri-kulobye. Ti kuma leswaku ku vulavurisana hi Bibele hi ku ntshunxeka na hi ku tiyimisela a swi vangi ku lwa. Ematshan’weni ya sweswo, swi vanga ku twanana ni ku rhula. I xiphemu xa nkoka xa vugandzeri bya ntiyiso.