“Mi Nga Paniwi Hi Laha Ku Nga Ringaniki”

TINKUZI timbirhi leti kombisiweke laha ti ni ntamu lowukulu ngopfu, lowu ti pfunaka ku koka mindzhwalo yo tika hi ku olova. Kambe a hi nge yin’wana ya tinkuzi ya susiwa ku nghena mbhongolo. Tanihi leswi mbhongolo yi nga yitsongo naswona yi tsaneke ku tlula nkuzi, kumbexana yi nga ha hlanula joko hi ku rahetela nketana leyi khomeke joko leri voyameke. Hi laha ku faneleke, nawu wa Xikwembu eIsrayele wu te: “U nga tshuki u rima hi nkuzi ni mbhongolo swi ri swin’we.”—Deteronoma 22:10, NW.

Muapostola Pawulo u tsale swin’wana leswi fanaka mayelana ni vanhu. U te: “Mi nga paniwi hi laha ku nga ringaniki.” (2 Vakorinto 6:14, NW) Leswi swi fanele ku tsundzukiwa loko ku hlawuriwa munghana wa vukati. Vukati i vunghana bya nkarhi hinkwawo, hikuva Yesu Kreste u te: “Leswi Xikwembu xi swi hlanganiseke, swi nga tshuki swi hambanisiwa hi munhu.” (Matewu 19:6) Ku vava ka mbilu loku tlulaka mpimo ku va kona loko mpatswa lowu tekaneke wu hambana hi ripfumelo, misinya ya milawu, ni tipakani. Hikwalaho swa twala ku landzela xitsundzuxo xa Bibele xo teka “ntsena eHosini.” (1 Vakorinto 7:39, NW) Ku nghenela vukati ni munhu loyi a nga wa vukhongeri lebyi hambaneke ni bya wena swi nga ha vanga swiphiqo leswikulu ku tlula ku pana nkuzi na mbhongolo.

Ku hambana hi vukhongeri ko va xivangelo xin’wana ntsena lexi nga endlaka mpatswa leswaku wu paneka hi laha ku nga ringaniki. Vanghana lava lavaka ku tekana—hambi loko va ri ni ripfumelo leri fanaka—va fanele va tivutisa, ‘Xana hi ni tipakani leti fanaka? Xana hi ta tshama kwihi? Xana i mani la nga ta hlela matirhiselo ya mali? Xana ha vumbirhi bya hina hi ta tirha? Ku vuriwa yini hi vana? Xana musa ni ku anakanyelana ku ta lawula vuxaka bya hina?’

Hi mpimo wo karhi, mukhuva lowu timhaka to tano ti kaneriwaka ha yona wu ta kombisa loko joko ri ta ringanela kumbe loko ri ta voyama. Kavula, ku hava vanhu vambirhi lava fanelanaka hi ku helela. Hambi swi ri tano, hi ku angarhela loko mpatswa lowu gangisanaka wu swi kota ku langutana ni ku lulamisa swiphiqo swin’we ni loko va swi kota ku hlayisa tindlela to vulavurisana ti pfulekile, swi le rivaleni leswaku a va nge paniwi hi laha ku nga ringaniki.