U Nga Vi Na Xikhomela

SWI nga ha vonaka swi tika swinene ku papalata ku va ni xikhomela loko munhu a hi dyohela. Bibele yi ni ndzayo leyi tirhaka exiyin’weni lexo tano. Muapostola Pawulo u tsarile: “Loko mi tshuka mi hlundzuka, mi nga weli eku dyoheni; dyambu ri nga tshuki ri pela ma ha hlundzukile.”—Vaefesa 4:26.

Loko munhu a hi khunguvanyisa, hi ntumbuluko swa hi hlundzukisa. Loko Pawulo a vula leswaku ku “hundzuka,” swi kombisa leswaku minkarhi yin’wana ku hlundzuka swi nga ha va swi fanerile—kumbexana hikwalaho ka ku nga khomiwi kahle kumbe ku hombolokisiwa ka vululami. (Ringanisa 2 Vakorinto 11:29.) Kambe loko swi nga lulamisiwanga, ku hlundzuka loku nga ni xivangelo lexinene ku nga tisa khombo, ku yisa exidyohweni lexikulu. (Genesa 34:1-31; 49:5-7; Pisalema 106:32, 33) Hikwalaho, xana u nga endla yini loko u hlundzukisiwile?

Loko swi khumba swihoxo leswi nga nyawuriki, u nga ha lulamisa xiyimo embilwini ya wena ni ku “miyela” kumbe u vonana ni munhu la ku dyoheleke ivi mi burisana hi mhaka ya kona. (Pisalema 4:4; Matewu 5:23, 24) Hi ndlela yihi na yihi, i swinene ku lulamisa timhaka hi ku hatlisa leswaku mholovo yi nga kuli ni ku humesa vuyelo lebyi vavisaka.—Vaefesa 4:31.

Yehovha u hi rivalela swidyoho swa hina mahala, hambi ku ri swidyoho leswi hi swi endlaka hi nga swi tivi. Xana hi nga rivalela swidyoho swa vanhu-kulorhi hi laha ku fanaka?—Vakolosa 3:13; 1 Petro 4:8.

Lexi tsakisaka, rito ra Xigriki leri vulaka “ku rivalela” hi ku kongoma ri vula “ku tshika nchumu wu hundza.” Ku rivalela a swi vuli swona leswaku hi vevukisa xidyoho kumbe ku xi pfumelela. Minkarhi yin’wana swi nga ha vula ku honisa xiyimo, hi ku tiva leswaku loko wo va na xikhomela swi nga engetela ndzhwalo wa wena ntsena ni ku onha vun’we bya vandlha ra Vukreste. Ku tlula kwalaho, ku va ni xikhomela swi nga vavisa rihanyo ra wena!—Pisalema 103:9.