Xihehlo Ehenhleni Ka Timbhoni Ta Yehovha Xi Tlhantlhiwa

ENDZHAKU ka loko xi tlheriseriwe endzhaku ko talanyana, Huvo ya Swikombelo eTesalonika le Greece eku heteleleni yi hlanganile hi June 8, 1995, leswaku ku ta tlhuvutsiwa xihehlo lexi mune wa Timbhoni ta Yehovha ta xisati ti hehliweke ha xona. Xana a va hehliwa ha yini? Vuproselita, lebyi nawu wa le Greece wu byi yiriseke ku tlula makume-ntlhanu wa malembe.

Hambi swi ri tano, hi nkarhi lowu huvo yi hlanganeke ha wona, mbhoni leyikulu ya vuchuchisi lebyi—ku nga muprista la hlohloteleke ku hehliwa ka vavasati lava va mune—a nga ha ri kona. Muprista un’wana u ringetile ku nyikela vumbhoni ematshan’weni ya mufi, kambe huvo a yi xi amukelanga xikombelo xakwe. Xisweswo, a swi hlamarisi leswi ku tenga loku ku heteke 15 wa timinete ntsena! Muavanyisi u kambisise timbhoni ta vuchuchisi lebyin’wana kutani a kuma leswaku vahehliwa a va ri hava nandzu wo endla vuproselita lebyi nga riki enawini. Xiboho lexi xi kombisa leswaku tihuvo ta le Greece ti tiyimiserile ku xixima ni ku namarhela xiboho lexi fikeleriweke hi 1993 hi European Court of Human Rights.

A swi hlamarisa ngopfu ku vona vavasati vanharhu lava nyikeleke vumbhoni bya vuchuchisi va ya eka vahehliwa lava nga Timbhoni, va ya va hoyozela hi timbilu ta vona hinkwato. Un’wana wa vona u te: “Ha tisola eka swilo hinkwaswo leswi humeleleke.” U ye emahlweni a ku: “A ku nga ri xihoxo xa hina. Muprista u hi sindzisile leswaku hi mi khomisa. Leswi sweswi a nga fa, hi lava leswaku mi ta emugangeni wa ka hina ni le makaya ya hina.”

Xisweswo, Yehovha nakambe u tlhele a endla vanhu vakwe va hlula hi ndlela leyi hlamarisaka eGreece. Milawu ya vuproselita yi sungule ku tirha le Greece hi 1938 na 1939. Hi 1993 European Court of Human Rights yi vule leswaku ku tirhisa nawu lowu leswaku ku xanisiwa Timbhoni ta Yehovha swi hoxile.—Vona Xihondzo xo Rindza xa September 1, 1993, matluka 27-31.