Ku Vonakala Ka N’wina A Ku Voninge!

EKU heteleleni nkarhi wu fikile wa leswaku mukhalabye a vona Mesiya la tshembisiweke! Hi ku hlavuteriwa hi Xikwembu Simiyoni a a swi tiva leswaku “a nga ka a nga fi a nga si vona Mesiya wa Hosi.” (Luka 2:26) Kambe vona ndlela leyi swi nyanyuleke ha yona loko Simiyoni a nghene etempeleni kutani Mariya na Yosefa va vekela Yesu n’wana emavokweni ya yena! U dzunise Xikwembu a ku: “Sweswi Hosi, u nga ntshunxa nandza wa wena a tifambela hi ku rhula . . . hikuva mahlo ya mina ma vonile ku ponisa ka wena . . . ku nga ku vonakala loku nga ta voninga matiko, ni loku Israele tiko ra wena ri nga ta tidzunisa ha kona.”—Luka 2:27-32; ringanisa Esaya 42:1-6.

Ku sukela eku khuvuriweni ka yena a ri ni malembe ya 30 hi vukhale ku ya fika eku feni ka yena, Yesu u tikombe a ri “ku vonakala” ka misava. Hi tindlela tihi? U vangamise ku vonakala ka moya hi ku chumayela malunghana ni Mfumo wa Xikwembu ni swikongomelo swa xona. U tlhele a paluxa tidyondzo ta mavunwa ta vukhongeri ni ku veka mintirho ya munyama erivaleni. (Matewu 15:3-9; Vagalatiya 5:19-21) Hikwalaho, Yesu u vule hi ku kongoma a ku: “Hi mina ku vonakala ka misava.”—Yohane 8:12.

Yesu u fe hi lembe ra 33 C.E. Xana ku vonakala ku timekile enkarhini wolowo? Nikatsongo! Loko a ha ri emisaveni, Yesu u byele vadyondzisiwa va yena a ku: “Ku vonakala ka n’wina a ku voningele vanhu.” (Matewu 5:16) Hi ku pfumelelana ni sweswo, endzhaku ka rifu ra Yesu valandzeri vakwe va hlayise ku vonakala ku tshama ku ri karhi ku vangama.

Hi ku tekelela Yesu, namuntlha Vakreste va kombisa ku vonakala ka Yehovha hi ku hlanganyela entirhweni wo chumayela. Va “hany[a] ku fana ni vanhu va ku vonakala,” va tikomba va ri swikombiso swa ku vonakala evuton’wini bya Vukreste.—Vaefesa 5:8.