Xana Va Ma Kuma Kwihi Matimba?

LOKO u languta phaphatana leri nga eka xifaniso lexi u ri ekusuhi, u ta xiya leswaku rin’we eka mune wa timpapa ta rona a ri na ntirho. Kambe, phaphatana ri ya emahlweni ri dya no haha. Leyi a hi mhaka yo hlamarisa. Maphaphatana ma xiyiwe ma endla mintirho ya wona ya siku na siku, hambiloko 70 wa tiphesente ta matlhelo ya le henhla ya timpapa ta wona ma nga ri kona.

Hi laha ku fanaka, vanhu vo tala va kombisa moya wa ku tiyimisela. Hambiloko va karhatiwa hi swiphiqo leswikulu swa miri kumbe swa ntlhaveko, a va heli matimba.—Ringanisa 2 Vakorinto 4:16.

Muapostola Pawulo hi yexe u tiyisele maxangu lamakulu hi nkarhi wa maendzo ya yena ya vurhumiwa. U xupuriwile, a biwa, a khandliwa hi maribye, a tlhela a khotsiwa. Ku engetela kwalaho, a a karhatiwa hi muxaka wo karhi wa vulamari; kumbexana xiphiqo xa mahlo ya yena, lexi eka yena a xi hambeta xi va “riphantsu enyameni.”—2 Vakorinto 12:7-9; Vagalatiya 4:15.

Nkulu wa Mukreste loyi vito ra yena a nga David, la nga lwisana ni gome lerikulu malembe yo hlayanyana, wa pfumela leswaku matimba ya Yehovha hi wona ma hoxeke xandla swinene leswaku a hlakarhela. Wa hlamusela: “Nkarhi na nkarhi nhluvukonyana lowu a ndzi wu endla, a wu nga tlhaveriwi hi dyambu. Loko nkarhi wolowo wa ku heleriwa hi matimba wu fika a ndzi titshega hi Yehovha hilaha ku heleleke, kutani u ndzi tiyisile hakunene. A ku ri ni minkarhi leyi a ndzi khongela tiawara to tala hi nkarhi wu ri wun’we. Kutani loko ndzi vulavule na Yehovha, ku titwa ka mina ndzi ri na xivundza ni ku titwa ndzi nga pfuni nchumu a swi nyamalala. A ndzi tshama ndzi langutane ni minkarhi ya ku tsana lokukulu, kambe hikwalaho ka mpfuno wa Yehovha, ku tsana koloko ku hundzuke ku va matimba—hambi ma ri matimba yo pfuna van’wana.”

Yehovha Xikwembu u tiyise Pawulo. Hikokwalaho, u swi kotile ku vula a ku: “Loko ndzi tsanile, hi kona ndzi nga ni matimba.” (2 Vakorinto 12:10) Ina, ku tsana ka Pawulo ku n’wi dyondzise ku titshega hi matimba lama humaka eka Xikwembu. Muapostola u te: “Ndzi nga endla hinkwaswo hi matimba ya Loyi a ndzi tiyisaka.” (Vafilipiya 4:13) Yehovha hakunene wa ma tiyisa malandza ya yena.