Vativi Va Langutisisa Swikhomela-ndhawu Swa Ngati
KWALOMU ka vativi va 200 lava humaka eUnited States a va hlangane eCleveland, Ohio, hi Mugqivela, October 7, 1995, leswaku va ya kanela hi mhaka ya swilaveko leswi andzaka swa vutshunguri: vutshunguri ni vuhandzuri lebyi nga tirhisiki ngati.
Ku kaneriwe hi swiyimo swo hambana-hambana leswi vangaka xiphiqo. Hi xikombiso, ku vuriwa yini loko muvabyi a karhatiwa hi ku tsana ka ngati ka xitshuketa? Xana n’wana la tswariweke nkarhi wa yena wu nga si fika a nga tshunguriwa njhani handle ka ngati? Xana vuhandzuri bya mbilu byi nga endliwa njhani hilaha ku humelelaka handle ka mpompelo wa ngati? Lexi tsakisaka, vuhandzuri lebyi nga tirhisiki ngati—lebyi hakanyingi byi endliwaka hi tindlela leti pfunaka miri leswaku wu tlhela wu tiphakela ngati hi woxe—ana se byi ringetiwile eswiyin’weni leswi hinkwaswo naswona ku ve ni vuyelo lebyinene.a
Ha yini ku ri ni xilaveko xa swikhomela-ndhawu swa mimpompelo ya ngati? “Hi kume leswaku hakanyingi mimpompelo ya ngati yi vanga vuvabyi, ngopfu-ngopfu vuvabyi bya xivindzi,” ku vula Sharon Vernon, mukongomisi wa Center for Bloodless Medicine and Surgery eXibedlhele xa St. Vincent Charity le Cleveland. U ya emahlweni a ku: “Hambiloko ngati yi nga vangi vuvabyi yi nga sivela vuswikoti bya muvabyi bya nsawutiso.” Hambileswi ku tluletiwa ka AIDS ku hungutiweke hi ku kamberiwa ka ngati, ka ha ri ni mavabyi yo tala lama nga tshuburiwiki hi vukamberi byo tano. Naswona ku nga khathariseki xilaveko xa lunghiselelo lerikulu, vuhandzuri lebyi nga tirhisiki ngati byi tikombe byi nga swi durheli swibedlhele, tanihi leswi byi hungutaka ni swiphiqo swa le nawini leswi nga ha vaka kona loko vavabyi va nyikiwa ngati leyi thyakeke.
Eka Timbhoni ta Yehovha, ku ni xivangelo xa nkoka swinene ku tlula ku papalata ku tirhisa ngati: Nawu wa Xikwembu wa swi sivela. (Mintirho 15:29) Kambe, ti lava ku kuma vutshunguri lebyinene hilaha swi nga kotekaka hakona. Xisweswo, ti tirhisane ni madokodela lama sunguleke ku endla vulavisisi bya vutshunguri lebyi nga tirhisiki ngati. Vutshunguri byo tano a byi vuyerisi Timbhoni ta Yehovha ntsena kambe ni van’wana vo tala lava chavaka makhombo ya mimpompelo ya ngati.
[Nhlamuselo ya le hansi]
a Vona minkandziyiso ya Awake! ya November 22, 1993, matluka 24-7, ni Xalamuka! ya February 8, 1996, tluka 31.
[Laha Xifaniso Xi Humaka Kona eka tluka 32]
WHO photo by P. Almasy