“U Nga Va Hlongoli!”

“LOKO un’wana wa Timbhoni ta Yehovha, hambi va ri vambirhi, va ndzawuta emutini wa wena, u nga va hlongoli!” ku tsundzuxa Corriere della Sera. Phepha-hungu leri a ri vulavula hi xiendlakalo lexi humeleleke eTreviso, en’walungwini wa Italy, laha n’wamabindzu a tihoxeke ekhombyeni ro lahlekeriwa hi ti-lire leti tlulaka miliyoni (ku tlula R2 600) hikwalaho ka leswi a hlongoleke Timbhoni timbirhi leti a ti n’wi endzerile.

Hi ku ya hi phepha-hungu leri, Timbhoni timbirhi ti vule marito lawa eka wanuna loyi: “Namuntlha i siku lerinene eka wena. Hi Timbhoni ta Yehovha, naswona hi ku tisele swilo swin’wana swa nkoka swinene.” Endzhaku ka sweswo, n’wamabindzu loyi wa lunya u pfale rivanti, a nga va nyikanga nkarhi wo ya emahlweni va vulavula.

Loko wanuna loyi a yingiserile, a a ta va a tive leswaku Timbhoni leti a ti fike ekaya rakwe a ti n’wi yisela xipaci, lexi ti xi kumeke ebencini rale ntangeni. Hikwalaho Timbhoni a ti nga ta endla nchumu handle ko teka xipaci lexi ni leswi nga endzeni ka xona ti xi yisa exitichini xa maphorisa xa le kusuhi. Hi siku leri tlhandlameke, phorisa ri xi yise eka n’wini wa xona.

“Loko munhu un’wana a ri xiyin’weni xa [Timbhoni] letimbirhi leti nga laviwiki,” ku vule Il Gazzettino di Treviso, “a ta va a . . . titekele xipaci lexi ni mali ya xona yo nyawula. Kambe hayi Timbhoni ta Yehovha, leti faneleke ku tshembeka hilaha ku heleleke.”

I yini lexi susumetelaka Timbhoni ta Yehovha leswaku ti “tshembeka hilaha ku heleleke”? Hileswi ti rhandzaka Xikwembu ni vanhu-kulobye, hi ku pfumelelana ni tidyondzo ta Yesu Kreste. (Matewu 22:37-39) Naswona hi yona mhaka leyi Timbhoni ta Yehovha ti fambaka hi yindlu na yindlu ti twarisa mahungu lamanene malunghana ni “misava leyintshwa” leyi hlamarisaka leyi tshembisiweke hi Yehovha Xikwembu. Rungula ro tano ra ntshembo i ra nkoka ku tlula rifuwo rihi na rihi ra leswi vonakaka!—2 Petro 3:13.