Ku Hetiseka Ka Vuprofeta Bya Bibele

ENKOMBISWENI wa le Imperial War Museum ya le London, eNghilandhi, ku na xikomba-nkarhi xo hlawuleka lexi hlayelaka tinomboro xa elekitroniki. Loko xikomba-nkarhi xi ri karhi xi rhendzeleka, xihlayela-tinomboro xa ntlokola tisekene tin’wana ni tin’wana ta 3,31. Loko xi ntlokola ku engeteriwa nomboro yin’wana eka ntsengo lowu. Ku ntlokola kun’wana ni kun’wana ni nomboro yin’wana ni yin’wana swi yimela wanuna, wansati kumbe n’wana lava nga fa hikwalaho ka nyimpi eka lembe-xidzana leri.

Xihlayela-tinomboro lexi xi sungule ku hlayela loku hi June 1989 kutani xi languteriwe ku heta ku hlayela exikarhi ka vusiku bya madyambu ya le mahlweni ka lembe ra 2000. Hi nkarhi wolowo nhlayo leyi nga ta va yi ri eka xihlayela-tinomboro yi ta va yi ri dzana ra timiliyoni—ku nga nhlayo leyi yi ringanyetiwaka ya mafu lama fambisanaka na nyimpi eka lembe-xidzana ra vu-20 hinkwaro.

Kwalomu ka malembe ya 2 000 lama hundzeke, Yesu Kreste u vhumbe nkarhi lowu ha wona ‘tiko rin’wana a a ri ta pfukela rin’wanyana, mfumo wun’wana wu lwa ni wun’wanyana.’ Hilaha ku faneleke Timbhoni ta Yehovha i khale ti ri karhi ti chumayela leswaku tinyimpi leti onhaka ta lembe-xidzana leri, kun’we ni ku tsekatseka ka misava ko tala, mintungu, ku kayivela ka swakudya ni swiendlakalo swin’wana, hinkwaswo i vumbhoni bya leswaku hi hanya “emasikwini ya makumu”—nkarhi lowu wu kombisa ku vekiwa ka Kreste eVuhosini bya le tilweni hi lembe ra 1914.—Luka 21:10, 11; 2 Timotiya 3:1.

Xihondzo xo Rindza xi titshege hi Bibele, xi huwelela mahungu lamanene ya leswaku Mfumo wa Xikwembu wu ta va herisa hi ku hatlisa lava tshikilelaka kutani wu hundzula misava yi va paradeyisi. Kutani hi byihi vumundzuku bya nyimpi? Bibele yi ri: “Tanani, mi hlalela mitiro ya Yehova, leŝi a ŝi heriseke misav̌eni. O herise tinyimpi ku yisa e makuṅweni ya misav̌a, o ṭhov̌ile mav̌ura, o fayetele matlhari, o hise magolonyi [ya nyimpi] e nḍilweni.”—Pisalema 46:8, 9.

[Laha Xifaniso Xi Humaka Kona eka tluka 32]

Clock: By Courtesy of the Imperial War Museum