“Yehovha U Hlamule Swikhongelo Swa Mina!”

EMISAVENI hinkwayo, Timbhoni ta Yehovha ti fambisa tidyondzo ta le kaya ta Bibele ta kwalomu ka ntlhanu wa timiliyoni, ni vanhu lava tsakelaka ku kuma vutivi lebyi kongomeke malunghana ni Xikwembu ni xikongomelo xa xona lexi hlamarisaka hi vanhu. Hambi ku ri vana lava nga kona exikarhi ka Timbhoni ta Yehovha va hlanganyela entirhweni lowu. Hi xikombiso, anakanya hi mufana loyi a vuriwaka Joel. U kombise ku tinyiketela ka yena eka Yehovha, kutani a khuvuriwa loko a ri ni malembe ya kaye hi vukhale. Endzhakunyana ka lembe, u ve ni ntokoto lowu:

“Loko ndzi ri ensin’wini, ndzi hlangane ni wansati la vuriwaka Candy. Ndzi n’wi fambisele broxara leyi nge ‘Vonani, Ndzi Endla Swilo Hinkwaswo Swi Va Leswintshwa’! Ana se a ri na yona, kutani ndzi n’wi fambisele buku leyi nge U Nga Hanya Hi Masiku aParadeyisini eMisaveni. Na yona ana se a ri na yona. Kutani, ndzi anakanya, ‘Ndzi fanele ndzi kombela wansati loyi leswaku a amukela dyondzo ya Bibele.’ U pfumerile!

“Makwavo wa Candy wa xisati, loyi a a vabya swinene hikwalaho ka leswi a a karhatiwa hi khensa, u te a ta tshama na yena. Ku engetela kwalaho, Candy a a dyondzela ku va muongori. Kutani, ku ringana nkarhi wo karhi, dyondzo ya Bibele a yi yimilenyana. Kambe mina ni vatswari va mina, hi hamba hi n’wi endzela, hi n’wi siyela timagazini kumbe hi ti siya eka nuna wakwe, Dick. U hi byele leswaku u veka timagazini emubedweni wakwe, naswona wa ti hlaya nivusiku.

“Eku heteleleni, makwavo wa Candy u lovile. Tatana na Manana swin’we na mina hi vulavule na Candy mayelana ni xiyimo xa vafi. U ehlekete ku pfuxeta dyondzo ya yena ya Bibele. Siku rin’wana hi vutise Dick loko a ta swi tsakela ku dyondza swin’we na Candy, naswona hi yi endla dyondzo ya ndyangu. U swi amukerile sweswo. Kutani sweswi, mina na Tatana hi dyondza na Dick swin’we na Candy. Va endla nhluvuko lowunene, naswona va phofula ku tlangela ka vona dyondzo ya Bibele.

“A ndzi ri karhi ndzi khongelela ku kuma dyondzo ya Bibele, naswona Yehovha u hlamule swikhongelo swa mina!”