“Hinkwerhu Hi Va Ndyangu Wun’we”

EMALEMBENI ya sweswinyana xihlawuhlawu ni vutiko bya vukhongeri swi hangalake ni misava hinkwayo. Ku nga twanani ka tinxaka ku vangele ku dlayana, ku xanisiwa ni nsele wun’wana lowu khomisaka tingana. Hi ku ya hi xiviko xa Amnesty International, ku nga xiximiwi ka malunghelo ya vanhu swi vangele leswaku vanhu lava tlulaka 23 wa timiliyoni emisaveni hinkwayo va baleka emakaya ya vona hi 1994.

ERwanda ntsena, kwalomu ka 500 000 wa vanhu va dlayiwile, naswona ku tlula 2 000 000 va hundzuke vahlapfa endzhaku ka loko ku pfuke madzolonga exikarhi ka Matutsi na Mahutu. Phepha-hungu ra le Belgium, Le Soir, ri vika leswi: “Timbhoni ta Yehovha ti xanisiwe ngopfu hikwalaho ka ku ala ka tona ku hloma.” Timbhoni ta Yehovha a ti hlanganyeli eka hasahasa ya nyimpi. Nilokoswiritano madzana-dzana ya tona ti dlayiwile emadzolongeni. Leswi swi hi tsundzuxa marito ya Yesu loko a byele vadyondzisiwa vakwe a ku: “Leswi mi nga riki va misava, . . . misava ya mi venga.”—Yohane 15:19.

Ndyangu wun’wana wa Timbhoni—Eugène Ntabana, nghamu yakwe ni vana vambirhi—a va tshama entsindza, eKigali. Loko a hlamusela vaakelani vakwe hi vukala-tlhelo bya Vukreste, Eugène a a hamba a vulavula hi mu-bougainvillea, mudiriva lowu kulaka hi ku khandziya, lowu hanyaka eka maxelo yo kufumela.—Matewu 22:21.

Eugène a a hlamusela a ku: “Laha Kigali mu-bougainvillea wu humesa swiluva swo tshwuka, swo tshwuka ku basuluka naswona nkarhi wun’wana swo basa. Kambe hinkwaswo i swa ndyangu wun’we. Swi tano ni hi vanhu. Hambileswi hi nga va tinxaka to hambana-hambana, va mivala yo hambana kumbe rixaka leri hambaneke, hinkwerhu hi va ndyangu wun’we, ndyangu wa vanhu.”

Khombo ra kona, ku nga khathariseki ku rhula ka vona ni vukala-tlhelo bya vona, ndyangu wa ka Ntabana wu dlayiwe hi ntshungu wa vapfukeri lava nga ni torha ra ngati. Hambiswiritano va fe va tshembekile. Hi nga tiyiseka leswaku Yehovha Xikwembu u ta hetisisa xitshembiso xa yena eka lavo tano, kutani va ta pfuxiwa leswaku va dya ndzhaka ya misava laha xihlawuhlawu xi nga ta va xi nga ha ri kona. (Mintirho 24:15) Kutani ndyangu wa ka Ntabana kun’we ni van’wana, “v̌a ta tiṭsakela e ku ruleni lo’kukulu ka v̌ona.”—Pisalema 37:11.