Vuyelo Bya Ku Va Ni Mbilu Yo Rhula

I KHALE sayense ya swa vutshunguri bya manguva lawa yi tiva leswaku ku hlundzuka loku nga lawuriwiki swi ni khombo emirini wa munhu. Malembe lama tlulaka dzana lama hundzeke, The Journal of the American Medical Association (JAMA) yi te: “Munhu hikwalaho ko hlundzuka u wela ehansi ivi a fa, kutani ku vuriwa leswaku kumbexana a a ri na mbilu leyi tsaneke leyi yi nga tsandzeka ku tiyisela ntshikilelo lowu nga tisiwa hi xiyimo xakwe xa mianakanyo. A nga kona na un’we loyi a vonakaka a ehleketa leswaku leswi swi vangiwe hi ku tlhandlekelana ka ku hlundzuka loku fikeke enhlohlorhini ivi ku hetelela ku tsanise mbilu yoleyo.”

Marito lawa ma boxiweke laha ehenhla a ma swi hlamarisi swichudeni swa Rito ra Xikwembu, Bibele. Malembe-xidzana ya 29 emahlweni ka ku va JAMA yi vulavule hi khombo ra ku va ni ximbilwana, Hosi Solomoni u huhuteriwe ku tsala a ku: “Ku ṭaka ka mmiri i mbilu le’yo basa.” (Swivuriso 14:30) Marito lawa ma ha ri ntiyiso ni namuntlha.

Hi ku tshama hi ri exiyin’weni xa ku rhula ha sirheleriwa eka mavabyi yo tala lama hakanyingi ma vangiwaka hi ntshikilelo wa mianakanyo, yo fana na ku tlakuka ka nsusumeto wa ngati, ku pandziwa hi nhloko ni swiphiqo swa ku hefemula. Hambiswiritano, ku engetela eka vutomi lebyi antswisiweke vuxaka bya hina ni van’wana byi ta kula loko hi lwela ku “ṭhika ku kariha, [hi] fularela ku lev̌a.” (Pisalema 37:8) Hi ntolovelo vanhu a va kokeleka eka Yesu hikwalaho ka moya wakwe wo rhula ni hi ndlela leyi a a va khathalela swi huma embilwini ha yona. (Marka 6:31-34) Hilaha ku fanaka, hi ta va lava phyuphisaka eka van’wana loko hi hlakulela ku va na mbilu yo rhula.—Matewu 11:28-30.