Timbhoni Ta Yehovha Ti Hlula Nakambe Egreece

HI October 6, 1995, mhaka leyi katsaka Timbhoni ta Yehovha timbirhi leti nga vatirheli va nkarhi hinkwawo yi tengiwile hi Huvo ya swirho swinharhu swa Majisitarata le Atena. A ti hehliwa hi nandzu wa vuproselita, naswona ti mangaleriwe hi phorisa rin’wana endzhaku ka loko Timbhoni ti endzele kaya ra rona.

Swivutiso leswi vutisiweke hi muavanyisi la ungamelaka swi kombise leswaku a a wu tsakela swinene ntirho wa Timbhoni ta Yehovha. Hi xikombiso u vutisile a ku: “Mi ni nkarhi wo tanihi kwihi mi ri karhi mi endla ntirho lowu? Emalembeni lama hundzeke vanhu a va mi khomisa ku yini? I n’wangulo wa muxaka muni lowu veke kona entirhweni wa n’wina? I yini leswi mi swi byelaka vanhu emakaya ya vona?” Hinkwavo lava a va ri ehubyeni a va rhiye ndleve eka vumbhoni lebyinene lebyi a byi ri karhi byi nyikeriwa.

Lexi hlamariseke Timbhoni ngopfu, hileswaku hambi ku ri gqweta leri a ri yimele hulumendhe, loko ri vulavula a ri yima na tona. Eka marito ya yena yo hetelela u te: “Timbhoni ta Yehovha ti ni mfanelo hi ku ya hi vumbiwa, ku nga ri ntsena yo pfumela eka Xikwembu xa vona ni ku xi gandzela, kambe ni ku tlhela ti twarisa vupfumeri bya tona hi yindlu na yindlu, emitsendzeleni ni le switarateni, hambi ku ri ku hangalasa tibuku ta tona mahala loko ti swi tsakela.” Gqweta leri ri tshahe swiboho swo hambana-hambana leswi humesiweke hi tihuvo ni Huvo-nkulu ya Tiko leswi kombiseke leswaku vagandzeri lava va kumiwe va ri hava nandzu. Ri tlhele ri kombetela emhakeni ya Kokkinakis v. Greece, leyi kombiseke ku seketeriwa ka Timbhoni ta Yehovha hi European Court of Human Rights.a Gqweta leri ri tsundzuxe ri ku: “Ndzi kombela mi tsundzuka leswaku Greece ri tshame ri rihisiwa hi mhaka leyi. Hikwalaho hi fanele hi va ni vukheta swinene loko hi komberiwa ku ta avanyisa timhaka to fana ni leti. Kahle-kahle timhaka leti ni ku tisiwa a ti nga fanelanga ti tisiwa ehubyeni.”

Endzhaku ka marito ya gqweta leri, a ku nga ri na swo tala leswi gqweta ra Timbhoni a ri ta swi vula. Hambiswiritano, ri tirhise nkarhi lowu leswaku ri kandziyisa leswaku nawu wa vuproselita wu lwisana ni vumbiwa naswona wu khomisa Greece tingana ematikweni hinkwawo.

Muavanyisi la ungamelaka u lo languta vaavanyisi lavan’wana vambirhi, ivi makwerhu wa xinuna ni wa xisati va ntshunxiwa handle ko kanakana. Ku tengisiwa loku, loku heteke awara ni khume ra timinete, a ku ri ku hlula ka vito ra Yehovha ni vanhu va yena.

Loku i ku hlula ka vumune loku katsaka timhaka ta vuproselita endzhaku ka mhaka ya Kokkinakis leyi tengiweke hi European Court of Human Rights. Timbhoni ta Yehovha eGreece ta tsaka leswi swiphiqo leswi yelanaka ni ku chumayela ka tona sweswi swi nga ha talangiki nileswi se swi kotekaka ku yisa ntirho emahlweni handle ko kavanyetiwa.

[Nhlamuselo ya le hansi]