I Mani Loyi A Lawulaka?
“I MANI loyi a fumaka misava?” Loko munhu o ku vutisa xivutiso xexo a wu ta xi hlamurisa ku yini? Vanhu vo tala va vukhongeri va nga ha vula leswaku i “Xikwembu” kumbe “Yesu.” Xihloko lexi nga eka The Freeport News, phepha-hungu ra le Bahamas, xi nyikele nhlamulo leyi vo tala a va nga ta yi rindzela.
Mutsari wa xihloko lexi u ri: “Ndzi kume xiphephana enyangweni wa yindlu ya mina. Hi ntolovelo a ndzi swi hlayi swilo leswi siyiweke enyangweni wa mina, kambe enkarhini lowu ndzi anakanye ku xi hlaya. Nhloko-mhaka-nkulu yi vutise xivutiso lexi nge, ‘I Mani Loyi Kahle-kahle A Fumaka Misava?’” Hi ku hlaya xiphephana lexi lexi sekeriweke eBibeleni, wansati loyi u dyondze leswaku mufumi wa misava leyi a hi Xikwembu kumbe Yesu, kambe i Sathana Diyavulosi.—Yohane 12:31; 14:30; 16:11; 1 Yohane 5:19.
Xiphephana xa hlamusela: “Anakanya hi ku pfumala ntwela-vusiwana loku hundzeletiweke, ni tihanyi leti chavisaka swonghasi. Vanhu va tirhise mathanki ya gasi, tikampa ta nxaniso, swibuluki leswi hoxiwaka, tibombo ta napalm, ni tindlela tin’wana leto biha to xanisana ni ku dlayana handle ka ntwela-vusiwana. . . . Hi wahi matimba lama susumetelaka vanhu ku endla swiendlo swa rivengo ro tano kumbe lawa ma va susumetelaka eka swiyimo leswi va endlaka va boheka ku endla swilo swo chavisa hi ndlela leyi? Xana u tshame u tivutisa loko swi nga ha endleka ku ri ni matimba yo biha lama nga vonakiki lama susumetelaka vanhu ku va ni vukarhi byo tano?” Xana swa hlamarisa leswi Bibele yi vitanaka Sathana tanihi “xikwembu xa misava leyi”?—2 Vakorinto 4:4.
Lexi tsakisaka, nkarhi wu le kusuhi wa leswaku Sathana ni mademona yakwe va herisiwa. “Misava ya hundza, ni ku navela ka yona, kambe loyi a endlaka ku rhandza ka Xikwembu, ú tshama hilaha ku nga heriki.” (1 Yohane 2:17) Ina, Bibele yi tshembisa leswaku lava va endlaka ku rhandza ka Xikwembu va ta kuma ntshembo wo hanya hilaha ku nga heriki emisaveni leyintshwa ya ku lulama. (Pisalema 37:9-11; 2 Petro 3:13; Nhlavutelo 21:3, 4) Mawaku ntshuxeko lowu nga ta va kona loko nkucetelo wo biha wa Sathana ni mademona yakwe wu ta va wu susiwile!
Endzhaku ka ku katsakanya rungula ra xiphephana lexi, mutsari wa xihloko lexi nga eka The Freeport News u gimete hi ku: “Ndza tsaka swinene leswi ndzi hlayeke xiphephana lexi . . . hikuva na mina a ndzi karhateka hi xiyimo xa misava, ni leswaku ku lawula mani.”