Ku Hlangavetana Ni Swihehlo Swa Mavunwa Efurwa

TIMBHONI TA YEHOVHA eFurwa sweswinyana a ti hehliwa hi swihehlo swa mavunwa leswi a swi huma ematlhelweni hinkwawo. Hi ku tirhisa swiendlakalo leswi chavisaka leswi katsaka mimpambukwa ya vukhongeri eYuropa ni le Japani, maphepha-hungu ma hangalase rungula leri soholotiweke malunghana ni Timbhoni. Ti kombisiwe ti ri yin’wana ya mimpambukwa leyikulu ni leyi nga ni khombo swinene.

Hi ku ringeta ku lulamisa timhaka, Timbhoni ta Yehovha ti kandziyise xiphephana lexi hlamulaka swivutiso swo tano swo tanihi leswi nge: I vamani Timbhoni ta Yehovha? Xana i Vakreste? Xana va byi amukela vutshunguri? Ha yini va famba hi yindlu na yindlu? Xana ntirho wa vona wu hakeleriwa njhani? Xana Timbhoni ta Yehovha ti va vuyerisa njhani vanhu?

Xiphephana lexi dyondzisaka lexi humesiweke hi ririmi ra Xifurwa a xi ku Jehovah’s Witnesses—What You Need to Know. Leswaku vanhu vo tala hilaha swi nga kotekaka hakona va kuma xiphephana lexi, ku lulamisiwe tsima. Ku sukela hi May 13 ku ya fika hi June 9, 1996, ku hangalasiwe swiphephana swo tlula kaye wa timiliyoni.

Xiphephana lexi xi tsakise vo tala, ku katsa ni vatirhela-mfumo lava tivekaka. “Ku xopaxopiwa ka Timbhoni ta Yehovha ku ndzi hlundzukise ngopfu,” ku tsale xirho xa huvo ya xifundzha endzhaku ka ku hlaya xiphephana lexi. “Nkarhi na nkarhi ndzi sungule ku tlangela ndlela leyinene leyi mi tikarhatelaka ku pfuna vanhu handle ka vutianakanyi ha yona entirhweni wa n’wina.” Loko xi hlamula malunghana ni xiphephana lexi, xirho xa Palamendhe ya le Yuropa xi tsarile: “Vunyingi bya vanhu va yi tiva kahle ndlela yo hambanisa exikarhi ka ntlawa wa Vakreste lowu n’wina mi nga xiphemu xa wona ni mimpambukwa.”

Le Brittany Mbhoni yi fambisele muprista xiphephana, ivi a xi amukela hi ntsako. Muprista u te: “Ndza mi bumabumela eka leswi mi swi endlaka.” Loko a engetela u te: “Ndzi khutaza lava ndzi nghenaka na vona kereke leswaku va mi amukela emakaya ya vona ni ku mi nyika kofi. Mi nga ha byela ni lava mi hlanganaka na vona leswaku a mi ri laha kaya ra mina. Nakambe ndzi lava ku mi byela leswaku ndzi rhandza ku hlaya tibuku ta n’wina.”

Endzhaku ka loko a amukele xiphephana, wanuna wa Muprotestente eAlsace u tsalele Sosayiti ya Watch Tower a kombela dyondzo ya Bibele. U tsarile: “Tanihi leswi ndzi lahlekeriweke hi ntshembo hinkwawo ekerekeni ya mina, sweswi ndzi langutele ku sungula hi vuntshwa hi tlhelo ra moya.” Ku nga khathariseki swihehlo swa mavunwa leswi minkarhi yo tala swi kongomisiwaka eka tona, Timbhoni ta Yehovha eFurwa—kunene, eswiphen’wini hinkwaswo swa misava—ti hambeta ti pfuna vanhu leswaku va fika laha va kumaka vutivi lebyi kongomeke bya swikongomelo swa Xikwembu, hilaha swi andlariweke hakona eBibeleni.—2 Timotiya 3:16, 17.