Ntwanano Wa Malembe Ya 403 Wu Le Khombyeni

ESWEDEN, Kereke ni Mfumo a swi ri ni vuxaka lebyikulu ku tlula 400 wa malembe. Sweswi ntwanano lowu nga kona exikarhi ka vukhongeri ni hulumendhe wa tsekatseka.

Vulutere byi simekiwe tanihi vukhongeri bya Mfumo hi 1593, naswona vanhu va le Sweden hinkwavo a va boheka ku va swirho swa byona leswi khuvuriweke. Endzhaku ka malembe layo tala, hi va-1850, ku endliwe ndzulamiso. A swi nga ha bohi leswaku vanhu va le Sweden va khuvuriwa; kambe a va tama va ha tekiwa va ri swirho swa Kereke ya Lutere. Hikwalaho, a va boheka ku hakela phesente yin’we eka xibalo xa muholo wa vona leswaku va seketela kereke ni ku hakelela mintirho yin’wana ya tiko leyi endliwaka hi kereke. Ku nga ri khale ku tlhele ku va ni ku cinca kun’wana. Ku sukela hi 1952, vanhu va le Sweden a va swi kota ku huma ekerekeni hi ndlela ya le nawini xisweswo va ntshunxeka va nga ha xi hakeli xiphemu lexikulu xa xibalo xa kereke.

Emalembeni ya sweswinyana Kereke ya Lutere yi ye emahlweni yi lahlekeriwa hi vulawuri bya yona eSweden. Leswi a swi nga papalateki, tanihi leswi 10 wa tiphesente ta vaaki va le Sweden ku nga valuveri lava nga riki Malutere, ku katsa ni Vayuda, Makhatoliki ni Mamuslim. Xisweswo, eku sunguleni ka 1996, a ku ri 86 wa tiphesente ntsena, ta vanhu va le Sweden lava a va ri swirho swa Kereke ya Lutere, naswona nhlayo yi ya emahlweni yi hunguteka.

Ku kula ka ku pfumala ku tsakela ku vanga ku avana exikarhi ka Kereke ni Mfumo. Ana se ku vuriwe leswaku a swi bohi leswaku hosi yi va yi ri Mulutere, naswona vana lava tswariwaka hi mutswari la nga Mulutere a va ha tekiwi hi ku olova va ri swirho swa Kereke ya Mfumo ya Lutere. Ku tlula kwalaho, hi ku ya hi The Dallas Morning News, hi lembe ra 2000, “muganga wa kereke ni mfumo swi fanele swi teka tinhundzu to tala swi avelana tona. Kereke yi fanele yi hunguta $1,68 wa magidi ya timiliyoni [R7850 wa timiliyoni] ta mali leyi yi averiwaka yona lembe na lembe, leyi yo tala ya yona yi hlengeletiwaka hi ku tirhisa swibalo.” Endzhaku ka ku sungula ka lembe-xidzana rero, kereke yi ta hamba yi hlawula tibixopo ta yona.

Loko ku pfumala ku tsakela ni ku hunguteka ka vuxirho swi ri karhi swi hlasela Vujagana, Timbhoni ta Yehovha eSweden ti hambeta ti andza. Xiviko xa 1997 Yearbook of Jehovah’s Witnesses xi vula leswaku ku ni 24-487 wa vahuweleri va Mfumo wa Xikwembu etikweni rero, naswona kwalomu ka 10 wa tiphesente ta vona i vatirheli lava chumayelaka va ri maphayona ya nkarhi hinkwawo. Vo tala va vona va fanelekela malunghelo lamakulu ya ntirho. Hi xikombiso, emintsombanweni ya muganga ya 1995 ya Timbhoni ta Yehovha, mimpatswa leyi tekaneke ya 20, yi tise swikombelo swa vuleteri bya vurhumiwa bya Xikolo xa Bibele xa Watchtower xa Gilead. Enkarhini wolowo, a ku ri ni kwalomu ka 75 wa mathwasana ya le Sweden ta mintlawa ya nkarhi lowu hundzeke, lawa a ma ri entirhweni wa vurhumiwa eswiphen’wini swo hambana-hambana swa misava. Handle ko kanakana, xikombiso xa vona lexinene ni mapapila lama khutazaka, swin’we ni maendzo ya vona swi nyika nsusumeto lowunene eka lava sweswi va anakanyaka hi ku nghenela lunghelo leri lerikulu.

Xisweswo, loko timiliyoni ta Vujagana ti ri karhi ti lahlekeriwa hi tlhelo ra moya, Timbhoni ta Yehovha “ta yimbelela hi ku ṭaka ka timbilu ta [t]ona.”—Esaya 65:13, 14.

[Mepe lowu nga eka tluka 30]

(Leswaku u vona rungula leri hleriweke hi ku helela, vona nkandziyiso wa kona)

Sweden