Xana Swivono Swo Fana Ni Lexi Swi Ta Herisiwa?

KUN’WANA ni kun’wana laha hi langutaka kona masiku lawa, hi vona swivono leswi kombisaka swiyimo swo tika, madzolonga ni nyimpi. Kambe xikongomelo xa magazini lowu a hi ku engetela swivono swin’wana swo biha eka leswi ana se u swi tivaka. Ematshan’weni ya sweswo, nkandziyiso lowu wo hlawuleka wu ta ku byela hi mintiyiso mimbirhi leyi chavelelaka. Wo sungula, hi leswaku vuprofeta bya khale bya Bibele byi vhumbile hi vunyingi bya timhaka to biha leti chavisaka ta nguva ya hina; wa vumbirhi, hi leswaku buku leyi leyi fanaka ya vuprofeta yi vulavula hi siku leri ha rona swivono swo tanihi xifaniso lexi kombisiweke laha, swi nga ta va swilo swa nkarhi lowu hundzeke. Tinyimpi a ti nge he vi kona. Ku hoxiwa ka tibomo a ku nge he vi kona, ni nhlaselo wa xitumbelelana, swibuluki leswi fuhlekiweke kumbe vutherorisi. Vana vo pfumala vatswari kumbe vabaleki vo pfumala makaya lava kayakayaka, a va nge he vi kona. Ku ta va ku ri tiko ra ku rhula ka xiviri, loku tsakisaka mbilu. Xana u nga swi tsakela ku hanya enkarhini wolowo? Hi ku khutaza leswaku u kambisisa leswi Bibele yi swi vulaka. U nga ha kuma nchavelelo lowu a wu nga anakanyi leswaku u nga wu kuma.