Loko Timbhoni Ta Yehovha Ti Endza

Xana Makhatoliki ma fanele ma endla yini loko un’wana wa Timbhoni ta Yehovha a ma endzela emakaya ya wona? Buku ya sweswinyana leyi hleriweke hi National Catechistic Bureau of the Italian Bishops’ Conference yi te: “Ku ala ku burisana na vona, hi ku titsongahata kambe hambiswiritano hi xivindzi, emhakeni leyi a hi ku va ni lunya.”

A hi Makhatoliki hinkwawo lama pfumelaka, hilaha swi kombisiweke hakona hi papila leri rhumeriweke hi wanuna la tshamaka le Foggia, eItaly eka Gazzetta del Mezzogiorno ya siku na siku:

“A ndzi un’wana wa Timbhoni ta Yehovha. Ndzi Mukhatoliki. Kambe ndzi hlamarisiwa hi milawu yo karhi leyi kereke yi yi vekelaka swirho leswi tshembekaka, yi swi byela ku namarheta switiviso leswi kombisaka leswaku Timbhoni ta Yehovha a ti laveki emakaya ya swona. Hambiswiritano, vanhu lava va chumayela Rito ra Xikwembu ntsena, naswona va pfuna van’wana ku va ni vutivi lebyi enteke bya Bibele. Swi ndzi tsundzuxa nkarhi lowu Italy ri hlaseriweke hi kholera kutani hi nyikiwe switsundzuxo swa ndlela leyi hi nga papalataka ku tluleriwa ha yona.

“Hi ku vona ka mina, leswi swi kombisa leswaku kereke yi veka milawu ya yona handle ko anakanyisisa hi ku navela ka swirho leswi tshembekaka. Kambe ku ringana malembe yo hlayanyana, ndzi xiye leswaku hambi ku ri Makhatoliki ma famba hi yindlu na yindlu, ma endzela ni makaya ya Timbhoni ta Yehovha; naswona ta va amukela, ti burisana na vona, a ti hlongoli munhu.”

Timbhoni ta Yehovha a ti sindzisi munhu ku amukela rungula ra tona. Ematshan’weni ya sweswo, ti lwela ku avelana ni van’wana ntshembo lowu nga eRitweni ra Xikwembu lowu ti wu kumeke wu chavelela eminkarhini leyi yo nonon’hwa. Hi ku famba hi yindlu na yindlu, swin’we na hi ku vulavula ni lava ti hlanganaka na vona exitarateni, Timbhoni ta Yehovha ti avela vanhu lava rhandzaka ku yingisa mahungu lamanene ya Mfumo wa Xikwembu.—Matewu 24:14; Mintirho 5:42; 17:17.