“Tindzalama Ta Ntiyiso”

“Tindzalama ta ntiyiso.” Yoleyo i ndlela leyi papila leri yaka erhavini ra le Nigeria ra Timbhoni ta Yehovha ri ti hlamuseleke ha yona timagazini timbirhi to hlawuleka. Mutsari wa rona loyi a nga jaha, wa hlamusela a ku:

“Ndzi tsalela ku phofula ku nkhensa ka mina loku humaka mbilwini hikwalaho ka matshalatshala ya n’wina yo vulavula hi timhaka hinkwato ta vutomi bya siku na siku hi ku tirhisa timagazini ta Xihondzo xo Rindza na Xalamuka!

“Ndzi ni malembe ya 17 hi vukhale. N’wexemu xitichi xa xiya-ni-moya xa le ndhawini ya ka hina xi simeke mphikizano wa xitsalwana lowu nga ni xihloko lexi nge ‘Rirhandzu Ri Vula Swo Tlula Rimbewu—AIDS I Ya Xiviri.’ Xitsalwana xin’wana ni xin’wana a xi nga fanelanga xi va ni marito lama nga ehansi ka mune wa madzana. N’wini wa xitsalwana lexinene a ta nyikiwa sagwadi ra 1000 naira [R58,50]. Kavula, va vule leswaku vanhu a va fanelanga va tsalela ku kuma sagwadi ntsena kambe, ematshan’weni ya sweswo va fanele va tlhela va dyondza swo karhi. . . .

“Ndzi kume rungula leri vulavulaka hi AIDS eka timagazini hatimbirhi. A ku ri ni swihloko swo tala leswi vulavulaka hi rirhandzu. Ndzi tirhise tinhla leti humaka eka Xalamuka! (hi Xinghezi) ya August 8, 1978.

“Kwalomu ka tin’hweti timbirhi endzhaku ka ku rhumela xitsalwana xa mina, vuyelo byi humesiwile. Lexi ndzi hlamariseke, ndzi ve wo sungula exifundzheni xa Cross River na Akwa Ibom!

“Rungula hinkwaro leri ndzi ri tirhiseke a ri huma eka timagazini leti. Swa hlamarisa hakunene leswi Yehovha a hi nyikaka rungula leri nga enkarhini emisaveni leyi nga ni maxangu ni leyi onhakeke. Tanihi Vakreste va ntiyiso, ha swi tiva leswaku ku ni swo tala, swo tala swinene swo swi rhandza ku tlula rimbewu. Naswona, ku hanya vutomi lebyi tengeke emahanyelweni swa hi sirheleta eka mavabyi yo tanihi AIDS.

“Ndzi titwa ndzi boheka ku mi nkhensa hikwalaho ka tindzalama leti ta ntiyiso leti mi tshamaka mi ri karhi mi ti humesa handle ko karhala. Onge Yehovha a nga ya emahlweni a katekisa matshalatshala ya n’wina loko mi ri karhi mi ya emahlweni mi humesa timagazini leti ta risima.”