Va Yime Va Tiya Ku Nga Khathariseki Nxaniso Wa Manazi

VUTSHEMBEKI bya Timbhoni ta Yehovha handle ko chava Manazi ya le Jarimani byi hambana swinene ni xiyimo lexi tekiweke hi tikereke ta Vujagana. Leswi swi xiyiwe hi profesa wa matimu John Weiss ebukwini ya yena leyi nge Ideology of Death. Wa tsala:

“Hi 1934 kereke ya Evangelical yi sindzise leswaku Manazi ma ‘amukeriwa hi Malutere,’ ivi yi nkhensa ‘Hosi Xikwembu’ hi ku nyika Majarimani ‘hosi ya tihosi leyi hisekaka ni ku tshembeka.’ . . . Bixopo wa Muprotestente u tsalele mufundhisi wa yena a ku, ‘[Hitler] u rhumeriwe hi Xikwembu eka hina.’” Weiss u ya emahlweni: “Kereke ya le Jarimani ya Methodist . . . yi pfumelelane na Bixopo Dibelius leswaku Hitler u ponise Jarimani eka ndzhundzunuko wa Bolshevik lowu a wu tshinerile, a tisa ku rhula ni matimba . . . Kereke ya Mormon yi tsundzuxe swirho swa yona leswi tshembekaka leswaku ku kanetana na Hitler a ku ri ku tlula nawu wa Mormon.” Naswona wa engetela: “Makhatoliki ma byeriwile leswaku a ku ri vutihlamuleri byo kwetsima ku yingisa mfumo lowuntshwa, vutihlamuleri lebyi nga tshikiwangiki hambi ku ri endzhaku ka loko vafundhisi va tive vubihi byo chavisa lebyi endliweke evuxeni.”

Kambe ku vuriwa yini hi Timbhoni ta Yehovha? Profesa Weiss u komba leswaku “tanihi ntlawa, ko va Timbhoni ta Yehovha ntsena leti aleke ku seketela Manazi.” Profesa Weiss u ya emahlweni a ku, magidi ya tona ma khotsiwile, “kambe Mbhoni yin’wana ni yin’wana leyi rhumeriweke ekampeni ya nxaniso a yi ta va yi ntshunxiwile ntsena hi ku sayina tsalwa ro landzula ripfumelo ra yona.”

Malunghana ni vutshembeki bya Timbhoni ta Yehovha, Profesa Weiss wa hlamusela: “Xikombiso xa vona xi kombisa ku tiyimisela loku nga tsekatsekiki ni xivindzi lexi a xi ri ni Vukreste byo sungula, ku endliwa ka byona nhlangano ni ku tinghenisa eka ntshamisano wa vona swi nga si hlula ku navela ku hanya vutomi byo tshembeka. Tanihi laha mufundhisi wa Muprotestente a tsaleke hakona ha vona, ‘A hi tikereke letikulu, kambe i vanhu lava lumbetiwaka ni lava hlekuriwaka lava yimeke va tiyile eka vukarhi bya Manazi, ni lava veke ni xivindzi xo kaneta hi ku ya hi ripfumelo ra vona.’”