Rivoningo Ro Ku Voningela eGondzweni Ra Vutomi

“OHO Yehova, nḍa ŝi tiv̌a, ndlela ya munhu a yi le matimbeni ya yena, kambe munhu l’a fambaka a nga ka a nga lulamisi renḍo ra yena.” (Yeremiya 10:23) Hi marito lawa muprofeta Yeremiya u kombise leswaku vanhu va nge swi koti ku lawula tindlela ta vona ta vutomi hilaha ku humelelaka handle ka mpfuno. Xana mpfuno wo tano wu nga kumiwa kwihi? Mupisalema wa hlamula exikhongelweni xa yena lexi yaka eka Yehovha Xikwembu a ku: “Rito ra wena i riv̌oningo e milengeni ya mina, ni ku v̌onakala e ndleleni ya mina.”—Pisalema 119:105.

Lava dyondzaka Rito ra Xikwembu, ku nga Bibele yo Kwetsima, ivi va tirhisa leswi yi swi vulaka va fana ni munhu la sungulaka riendzo nimixo swinene. Eku sunguleni, a nge voni kahle hikuva ka ha ri ni munyama. Kambe loko dyambu ri sungula ku tlhava, u sungula ku vona kahle. Eku heteleleni, dyambu ri ba ehenhla ka tshavatshava. Eka yena swilo hinkwaswo swi lo dla, erivaleni. Xifaniso lexi xi tsundzuxa munhu hi xivuriso xa Bibele lexi nge: “Ndlela ya la’v̌o lulama yi kotisa ku v̌onakala, ku hatima ka kona ka engeteleka ku fikela nhlekanhi lo’wukulu.”—Swivuriso 4:18.

Ku vuriwa yini hi lava alaka nkongomiso wa Xikwembu? Bibele yi ri: “Kambe ndlela ya v̌adyohi yi kotisa munyama, a v̌a tiv̌i laha v̌a welaka kona.” (Swivuriso 4:19) Ina, lavo biha va fana ni munhu la waka emunyameni. Hambiloko swi tikomba onge swi famba kahle, i swa nkarhinyana, hikuva “a ku na v̌utlhari, a ku na ku anakanya, a ku na makungu [lama nga lwisanaka na, NW] Yehova.”—Swivuriso 21:30.

Hikwalaho, landzelela nkongomiso wa Rito ra Xikwembu, ku nga Bibele. Loko u endla tano, u ta kuma leswaku marito ya Swivuriso 3:5, 6 i ntiyiso: “Ṭhemba Yehova hi mbilu ya wena hikwayo, u nga tiṭhembi ku tlhariha ka wena. U ṅwi nghenisa e makungwini ya wena hikwawo, o ta lulamisa tindlela ta wena.”