I Switshembiso Swa Mani Leswi U Nga Swi Tshembaka?

HI 1893 ntlawa wa vanhu va 74 lava nga vatshila eka swa ntshamisano wu hlanganile eChicago World’s Fair leswaku wu ta burisana hi vumundzuku. (Ndhawu ya wona yi kombisiwile laha henhla.) Loko va vulavule hi malembe ya 100 lawa a ma ri emahlweni, lama heleke hi 1993, va vhumbhe swin’wana swa leswi landzelaka: “Vanhu vo tala va ta hanya malembe ya 150.” “Makhotso ma ta hunguteka naswona ku dlaya vukati ku ta tekiwa tanihi loku nga bohiki.” “Ku fuma ku ta olovisiwa, tanihi leswi vukulu bya tiko byi tikombaka byi olovisiwile minkarhi hinkwayo.”

Hilaha ku fanaka, hi 1967 buku leyi nge The Year 2000 yi vhumbhe yi ku: “Hi lembe ra 2000, tikhompyutara ti ta ringana, ti tekelelana kumbe ti hundza byin’wana bya vutlharhi lebyi ‘fanaka ni bya munhu,’ kumbexana ku katsa ni vuswikoti bya yena bya ntivo-vuxongi ni bya ku vumba.” “Mianakanyo yo tirhisa michini leyi fanaka ni munhu leyi kumekaka hi nxavo wa le hansi leswaku yi tirha mintirho yo tala ya le ndlwini . . . swi tikomba yi ta hetiseka swinene hi lembe ra 2000.”

Ku tsandzeka ka vanhu ku vhumbha swiendlakalo swa nkarhi lowu taka ku hambana swinene ni vuswikoti bya Xikwembu. Hi xikombiso, ringanisa ku vhumbha loku boxiweke laha henhla ni leswi Bibele yi swi vhumbheke kwalomu ka malembe-xidzana ya 20 lama hundzeke malunghana ni siku ra hina: “Vanhu va ta va lava tirhandzaka, va ta va lava rhandzaka mali ngopfu, ni ku tikurisa, ni ku titiva, ni ku rhukana; va ta va lava nga yingisiki vatswari va vona, lava nga riki na ku nkhensa, lava nga khongeriki; va ta va vanhu va tihanyi, lava nga riki na ku tsetselela, valumbeti, lava nga tikotiki, lavo leva, lava vengaka leswo lulama; va ta va timbabva, vanhu va futa, lava nga ni manyunyu, lava rhandzaka ku tiphina ku tlula ku rhandza Xikwembu. Va ta tiendla wonge hi loko va ri ni vukhongeri, kambe va ta ala matimba ya byona.”—2 Timotiya 3:1-5.

Vuprofeta lebyi bya Bibele bya malunghana ni “[masiku] ya makumu” i byin’wana bya vuprofeta byo tala lebyi hetisekeke esikwini ra hina. Rito ra Xikwembu ri vhumbhe leswaku “xikombiso” xa vukona bya Yesu xi ta katsa tinyimpi ta misava, ku pfumaleka ka swakudya, mintungu, ku tsekatseka ka misava ni ku chumayeriwa ka mahungu lamanene ya Mfumo wa Xikwembu emisaveni hinkwayo.—Matewu 24:3-14; Luka 21:11.

Ku pakanisa loku nga hoxisiki ka switshembiso swa Xikwembu ku susumetele mutsari un’wana wa Bibele eka malembe-xidzana yo tala lama hundzeke ku vula a ku: “A ku wanga na rito riṅwe ra marito hikwawo la’manene lawa Yehova, Šikwembu ša ṅwina, a ma v̌uleke henhla ka ṅwina; kambe mi endleriwe hikwawo, a ku wanga na rito riṅwe.”—Yoxuwa 23:14.

Ina, hi nga tiyiseka leswaku switshembiso hinkwaswo swa Xikwembu swi ta hetiseka ku nga ri khale. Mfumo wa Xikwembu wu ta herisa vuvabyi, vugevenga, ku godzomberiwa hi swidzidzirisi, ndlala ni nyimpi—misava hinkwayo yi ta va paradeyisi. (Pisalema 37:10, 11, 29; Nhlavutelo 21:3, 4) U nga titshega hi ku hetiseka ka vuprofeta lebyi! Byi huma eka Muvumbi wa hina, “[la] nga riki na ku hemba.”—Tito 1:2; ringanisa Vaheveru 6:13-19.

[Laha Xifaniso Xi Humaka Kona eka tluka 32]

Cleveland State University Archive