Milawu Ya Khume

BIXOPO wa le Nghilandhi wa Gloucester u kume leswaku vafundhisi vo tlula hafu va le xifundzheni xa yena a va nga yi tivi hi nhloko Milawu ya Khume, naswona 10 wa tiphesente ta vona a va nga swi tivi leswaku yi kumeka kwihi eBibeleni. Kambe swoleswo swi humelele malembe ya 450 lama hundzeke. Xana xiyimo xi antswile endzhaku ka sweswo? Nikatsongo—hilaha nkambisiso wa xitshuketa lowu wa ha ku endliwaka hi Sunday Times malunghana ni vafundhisi va Anglican wu paluxeke hakona.

Eka vafundhisi va 200 lava ku vulavurisaniweke na vona, ko va 34 wa tiphesente ntsena lava koteke ku tshaha Milawu ya Khume hinkwayo. Eka lavan’wana, un’wana u vone onge yi ni swipimelo swo tala ngopfu, naswona un’wana u yi teke tanihi leyi nga pfuniki nchumu eka swiphiqo swa mahanyelo swa manguva lawa.

Xana wena wa yi tiva Milawu ya Khume kumbe leswaku u nga yi kuma kwihi? Yi tsariwe eka Eksoda, buku ya vumbirhi ya Bibele, eka tindzimana to sungula ta 17 ta ndzima 20. Ha yini u nga yi hlayi? Hi leyi ndlela yo olova yo yi avanyisa hi mintlawa. Ya mune yo sungula yi vulavula hi vugandzeri bya hina eka Xikwembu, wa vuntlhanu wu kandziyisa vutomi bya ndyangu, wa vutsevu ku ya eka wa vukaye wu khumba vuxaka bya hina ni vanhu-kulorhi, naswona wa vukhume wu hlawulekile, wu endla leswaku hi kambisisa timbilu ta hina ni minsusumeto ya hina. Hi lowu nkatsakanyo wa ndlela leyi Vakreste va nga tirhisaka misinya leyi ya milawu ha yona.

Wo sungula: Hi fanele hi tinyiketela eka Muvumbi wa hina ntsena. Wa vumbirhi: U nga tirhisi swifaniso evugandzerini. Wa vunharhu: Minkarhi hinkwayo u va ni xichavo ni ku xixima vito ra Xikwembu. Wa vumune: Vana ni nkarhi wo anakanyisisa hi timhaka ta moya, handle ko kavanyetiwa. Wa vuntlhanu: Vana, xiximani vatswari va n’wina. Wa vutsevu: U nga tshuki u dlaya. Wa vunkombo: Papalata vuoswi. Wa vunhungu: U nga tshuki u yiva. Wa vukaye: Vulavula ntiyiso. Wa vukhume: Papalata makwanga.

Milawu ya Khume a yi ri xiphemu xa nxaxamelo wa milawu leyi nyikiweke Muxe. Kambe misinya ya milawu leyi yi yi tameleke a yi nga hundzeriwi hi nkarhi. (Varhoma 6:14; Vakolosa 2:13, 14) Hikwalaho ka xivangelo lexi, valandzeri va Yesu va tshahe Milawu ya Khume ni ku kombetela eka yona. (Varhoma 13:8-10) Vutomi a byi ta va lebyi tsakisaka—ni lebyi hlayisekeke swonghasi—namuntlha loko vanhu hinkwavo a va xixima ni ku hanya hi misinya leyi ya milawu leyi huhuteriweke hi Xikwembu!