Nhlamulo Leyi Tlhontlhaka

CATHOLIC HERALD, phepha-hungu ra Rhoma Khatoliki ra le Britain, ra ha ku humesa papila leri landzelaka leri humaka eka muhlayi wa le Wales: “Vusiku byin’wana, Timbhoni ta Yehovha timbirhi ti tile ekaya ka mina. Ndzi swi kotile ku vula leswaku a ku ri Kereke ya Khatoliki leyi tiyisekiseke vutshembeki bya Testamente Leyintshwa leyi a ti yi tshaha. Lexi ndzi hlamariseke un’wana wa vona u pfumerile. U te, ‘Ina ma yi tiyisekisa kambe a mi yi landzeli. Yesu u te, “Rhandzanani tanihi leswi na mina ndzi mi rhandzeke,” kambe n’wina ma dlayana. Eka nyimpi leyi hundzeke, Makhatoliki ma dlaye Makhatoliki, kambe ku hava Mbhoni ya Yehovha leyi dlayeke [Mbhoni-kulobye].’ A ndzi ta endla yini loko ku nga ri ku swi pfumela? Xana hi nga byi khongelerisa ku yini vun’we hi ri ‘vamakwerhu lava avaneke’ loko ku nga ri na vun’we bya xiviri exikarhi ka hina? Xana a hi fanelanga hi rhanga hi lunghisa xisandzu lexi?”—Yohane 15:12.

Tinyimpi timbirhi ta misava ta lembe-xidzana leri ra vu-20 ti sungule eVujaganini ivi ti koxa vutomi bya vanhu va kwalomu ka 50 ku ya ka 60 wa timiliyoni. Kambe, entiyisweni ku nga vuriwa leswaku Timbhoni ta Yehovha a ti hlanganyelanga etinyimpini toleto, naswona a ti hlanganyeli etinyimpini tihi ni tihi leti nga kona sweswi. Xana leswi swi kotekisa ku yini? U nga pfuneka ku kuma leswi engetelekeke malunghana ni swiboho swa matimba swa rirhandzu ni vun’we bya Vukreste leswi Timbhoni ta Yehovha leti tlulaka ntlhanu wa timiliyoni emisaveni hinkwayo ti nga na swona.—Ringanisa Esaya 2:4.

[Laha Xifaniso Xi Humaka Kona eka tluka 32]

U.S. National Archives photo