Ma Dzunisa Muvumbi Wa Wona Ma Miyerile

KU PELA ka dyambu ka tsakisa hi ntumbuluko. Kambe ku vona dyambu ri ri karhi ri nyupela endzhaku ka ntshava leyi ya Apuan Alps ya le Tuscany, eItaly, ka hlamarisa hakunene.

Loko u ri languta u ri ekule, dyambu ri vonaka ri wela ehenhla ka ntshava ematshan’weni yo nyupela endzhaku ka yona. Ha yini? Hikuva nhlohlorhi ya ntshava yi ni xivurha xa ntumbuluko lexi vonakaka onge xi lo kovotliwa entshaveni. Hakunene, nhlohlorhi leyi yi faneriwa hi vito ra yona, Monte Forato—Ntshava leyi Tlhaviweke. Hikwalaho ka ku rhendzeleka ka misava hi dyambu, lava ri langutaka eka xivurha va nga ri vona ri wela eMonte Forato kambirhi ntsena lembe rin’wana ni rin’wana.

Ku fana ni swivumbeko swin’wana swa ntumbuluko, matilo lama nga hanyiki ma dzunisa Muvumbi wa wona. Hi ndlela yihi? Hi ndlela leyi fanaka ni leyi xifaniso xo saseka xi nga tisaka ku dzuneka ha yona eka mumpfampfarhuti wa xona. Entiyisweni, swilo swa le tilweni swi vulavula hi matimba, vutlhari ni vukulukumba bya Yehovha. Hilaha mupisalema a swi vekaka hakona, “matilo ma v̌ula ku kwetsima ka Šikwembu, ni mpfhuka wu tiv̌isa ntiro wa mav̌oko ya šona.” (Pisalema 19:1; 69:34) Tanihi leswi dyambu ni swilo swin’wana leswi nga hanyiki swi dzunisaka Muvumbi wa swona, hina hi fanele hi n’wi dzunisa ku tlula swona!—Pisalema 148:1, 3, 12, 13.