Madokodela, Vaavanyisi Ni Timbhoni Ta Yehovha

HI MARCH 1995, Timbhoni ta Yehovha ti seketele tiseminara timbirhi le Brazil. Xikongomelo xa kona a ku ri xihi? A ku ri ku lava ku kuma ndlela yo tirhisana ni vanhu lava tirhanaka ni swa vutshunguri ni nawu loko muvabyi a ri un’wana wa Timbhoni ta Yehovha naswona a nga wu amukeli mpompelo wa ngati exibedlhele.—Mintirho 15:29.

Lexi vavisaka, minkarhi yin’wana madokodela ma honise ku navela ka vavabyi lava nga Timbhoni naswona va lave ku nyikiwa mpfumelelo hi huvo leswaku va sindzisa mpompelo wa ngati. Eswiyin’weni swo tano Timbhoni ti tirhise tindlela tin’wana ni tin’wana ta le nawini leti a ti ri kona leswaku ti tisirhelela. Hambiswiritano, ti hlawule ku tirhisana ematshan’weni ya ku himpfilitana. Xisweswo, tiseminara ti kandziyise leswaku ku ni swikhomela-ndhawu swo tala swa vutshunguri bya mpompelo wa ngati leswi nga ni nkoka lowu fanaka, leswi Timbhoni ta Yehovha ti swi amukelaka hi ntsako.a

Nhlangano wa Regional Council of Medicine wa le São Paulo ana se a wu seketele xiyimo xa Timbhoni. Hi January 1995, wu bohe leswaku loko vutshunguri lebyi bumabumeriweke hi dokodela byi nga tsakeriwi, muvabyi u ni mfanelo yo byi ala ni ku tihlawulela dokodela un’wana.

Lexi nkhensekaka, sweswi ku ni madzana ya vanhu va swa vutshunguri le Brazil lava tiyimiseleke ku tirhisa vutshunguri lebyi nga riki na ngati eka vavabyi va vona lava byi kombelaka. Hi mpfhuka ka tiseminara ta March 1995, ntirhisano exikarhi ka madokodela, vaavanyisi ni Timbhoni ta Yehovha eBrazil wu antswe hi ndlela leyi xiyekaka. Hi 1997 magazini wa swa vutshunguri wa le Brazil lowu vitaniwaka Âmbito Hospitalar wu humese xihloko lexi sindziseke leswaku malunghelo ya Timbhoni ta Yehovha emhakeni ya ngati ma xiximiwa. Sweswi swi xiyiwa swinene leswaku, hilaha swi vuriweke hakona hi Regional Councils of Medicine exifundzeni xa Rio de Janeiro ni le São Paulo, “ntirho wa dokodela wo sirhelela vutomi bya muvabyi wa yena a wu fanelanga wu tlula ntirho wa yena wo lwela lunghelo ra muvabyi ro hlawula.”

[Nhlamuselo ya le hansi]