‘U Ma Tive Ku Sukela Loko Wa Ha Ri Ricece’

HI KU ya hi nkambisiso wa sweswinyana wa sayense, ku vulavula ni tincece swi kucetela ku kula ka mabyongo ya tona hilaha ku enteke, swi tiyisa vuswikoti bya tona byo anakanya ni ku tlhantlha swiphiqo. Sweswo swi tano ngopfu-ngopfu eka lembe ro sungula ra vutomi bya n’wana. International Herald Tribune yi vika leswaku vakambisisi van’wana sweswi va pfumela leswaku “nhlayo ya marito lawa ricece ri ma twaka siku rin’wana ni rin’wana hi yona ntsena yi kombisaka swinene loko endzhaku a ta va la tlhariheke, a va la humelelaka exikolweni ni ku va ni vutshila evanhwini.”

Hambiswiritano, marito lama vulavuriwaka ma fanele ma huma emunhwini. Swi vonaka onge thelevhixini kumbe xiya-ni-moya a hi xikhomela-ndhawu.

Mutivi wa misiha wa le Yunivhesiti ya le Washington eSeattle, U.S.A. u te: “Sweswi ha swi tiva leswaku swihlanganisi swa misiha swi vumbiwa eku sunguleni swinene ka vutomi ni leswaku byongo bya ricece byi rindzele mintokoto hi ku kongoma yo kumisisa ndlela leyi swihlanganisi swi vumbiwaka ha yona. A hi nga yi xiyi ndlela leyi fambiselo leri ri sungulaka hi ku hatlisa ha yona ku kondza ku va sweswinyana. Hi xikombiso, tincece ti dyondze mimpfumawulo ya ririmi ra rikwavo loko ti ri ni tin’hweti ta tsevu.”

Nkambisiso wa sweswinyana wu lwisana ni mavonelo lama hangalakeke ya leswaku vana va ta tlhariha loko va kuma ntsena rirhandzu leri teleke. Wu tlhela wu kandziyisa nkoka wa vatswari eka ku kula ka n’wana.

Leswi swi hi tsundzuxa marito ya papila leri huhuteriweke ra muapostola Pawulo leri yaka eka Timotiya: “Ku sukela loko wa ha ri ricece u tive matsalwa yo kwetsima, lawa ma swi kotaka ku ku tlharihisa leswaku u ta pona.” A swi kanakanisi leswaku matsalwa yo kwetsima lawa Timotiya a dyondzisiweke wona a ha ri ricece hi mana wa yena na kokwa wa yena wa xisati lava nga vapfumeri, ma pfune swinene eku kuleni ka yena a ri mutirheli wo hlawuleka wa Xikwembu.—2 Timotiya 1:5; 3:15.