Mahanyelo Lamanene Ma Tisa Ku Dzuneka

PHEPHA-HUNGU ra le Italy leri vitaniwaka La Gazzetta del Mezzogiorno ri bumabumele Timbhoni ta Yehovha hi ku humesa xihloko lexi nge “Matera—Muti Wa Vutshamo Byo Hlawuleka Bya Mabako.” Xihloko lexi xi humelele eka magazini wa Xalamuka! wa July 8, 1997 (wa Xinghezi), lowu hangalasiweke swinene hi tindzimi to tala. Xalamuka! sweswi yi hundzuluxeriwa hi tindzimi ta 81 naswona ku hangalasiwa tikopi to tlula 19 wa timiliyoni emisaveni hinkwayo. Phepha-hungu leri ri vule leswaku Xalamuka! yi tivekela pakani yo hangalasiwa swinene ximumu lexi “malunghana ni ku koka nyingiso wa vanhu leswaku va seketela ndzhaka ya matimu ni ya vutshila ya muti lowu [wa Matera].”

Phepha-hungu leri ri bumabumele Timbhoni malunghana ni Ntsombano wa Muganga wa “Ku Pfumela eRitweni Ra Xikwembu” lowu khomeriweke eMatera hi 1997. Xihloko lexi xi vule leswaku Timbhoni ti swi kotile “ku kuma vanhu va 4000 leswaku va ta eXXI Settembre Stadium [emutini lowu] hi ximumu naswona ehansi ka dyambu leri vavulaka; va basisile, va tlhela va penda naswona va antswise ndhawu leyi ya mintlango (ngopfu-ngopfu swihambukelo) mahala, va hakelele mali ya swilo leswi a swi laveka.”

Timbhoni ta Yehovha ti lwela ku va vaakelani lavanene. (Matewu 22:37-39) Nakambe ti landzelela xitsundzuxo xa Matsalwa lexi nge: “Hlayisani ku tikhoma ka n’wina ku ri kunene exikarhi ka matiko, leswaku . . . va dzunisa Xikwembu hi siku ra ku kambela ka xona hikwalaho ka mintirho leyinene ya n’wina leyi va nga timbhoni leti yi voneke hi mahlo.”—2 Petro 2:12.